Så glad blei bjønnen frå Kostveit då han vann Marcialonga

Runar Skaug Mathisen frå Vinje gjekk heilt til topps i prestisjetunge Marcialonga sundag.

Med vel to mil att av løpet fekk Skaug Mathisen ei luke, ei luke han sjølv blei overraska over. Den gav han aldri frå seg – sjølv om det blei jamt inn på oppløpet. Lagkamerat Emil Persson frå Team Lager 157 var nærmast, 4,8 sekundar bak vinbyggjen – bjønnen frå Kostveit. Johan Hoel blei nummer tre, vel fem sekundar bak Skaug Mathisen.

– Dei kom fort på slutten. Den siste bakken var heilt grusom. Eg var så sliten, sa ein glad vinnar til NRK etter målgang.

På det meste leia han med eitt minutt. Då fekk han tru på siger.

– Dette har eg drøymd om i mange år. Marcialonga er det råaste rennet i Ski classics, sa Skaug Mathisen til NRK.

Han brakk ein stav alt etter ti kilomter, men fekk hjelp av lagkameratane. Spesielt trekte han fram Emil Persson som «bremsa feltet» bak han.

– Laget jobba for meg i dag, sa Skaug Mathisen.

– Eg trur eg er den fyrste frå Vinje som har vunne Marcialonga, la han til med eit smil.

Skaug Mathisen fekk laurbærkransen som bevis på at han var best i det sju mil lange rennet i Italia. Ikkje berre var han best, han sette også løyprekord med tida 2.35,53. Ifylgje VG var triumfen Noregs fyrste i Marcialonga sidan 2020. Då gjekk Tore Bjørseth Berdal til topps.

– Målet er å vinne eit renn, sa Mathisen då VTB snakka med han i romjoli.

Førre helg viste han at forma var på gang. Då blei han nummer fire i La Diagonela i Sveits. Sundag var han best av alle. Det er fyrste gong han er i langløpssamanheng. Han har ein 2. (Årefjellsrennet 2022) og 3. plass (Birkebeinerrennet 2023) frå før.