Til topps: Ragnhild Knudsen frå Seljord folkemusikklag spela godt i Såheimshallen, og vann D-klassa for hardingfele. Foto: Anne Sofie Tresland

Ragnhild blei best av seniorane

Representantar for Vest-Telemark stod for mange gode prestasjonar på Landskappleiken på Rjukan i helga. Ragnhild Knudsen frå Seljord folkemusikklag toppa klassa si.

I alt sju deltakarar stilte med spel i hardingfele klasse D, klassa for dei over 60 år. Best av alle blei Ragnhild Knudsen frå Seljord folkemusikklag med 75 poeng. På dei neste plassane fylgde Knut M. Sandal frå Indre Sunnfjord Spelemannslag og Ingar Vaskinn frå Kongsberg spel- og dansarlag.

Læremeister for mange

Ragnhild Knudsen har undervist seljordsungar i felespel i ei årrekkje. Ho var også fyrste læremeisteren til Marie Tveiten, som gjorde eit solid comeback på Rjukan. I 2010 vann Tveiten klasse C, klassa for dei under 18 år, på Landskappleiken på Voss. Sidan har ho ikkje stått på ei kappleikscene. Etter tolv år tok ho altså steget. Til Vest-Telemark blad fortalde ho at det viktigaste no var å stille. Noko pallplass rekna ho slett ikkje med, så etter spelinga heiv ho seg i bilen med kurs for heimbygda Seljord. Så kom telefonen som fortel at ho hadde gått heilt til topps.

– Eg stoppa, gjekk ut og hoppa rundt bilen i glede, sprudlar ho.

Marie er svært takksam for den gode læremeisteren ho hadde i unge år, og gler seg storleg over at Ragnhild Knudsen også blei klassevinnar.

A-klasse hardingfele blei vunnen av Alexander Aga Rønynstrand, Hardanger spelemannslag, med 92 poeng – eitt poeng framfor bøheringen Per Anders Buen Garnås.

2. plass: Sara Fjågesund Aase og Helge Sigurd Amdal Telnes blei slegne berre med eitt poeng for springaren dei dansa. Spelemann er Per Anders Buen Garnås. Foto: Privat

Syskenbarn i toppsjiktet

I folkedansen gror det også godt. Heile tretti dansepar stilte i B-klassa for dans etter hardingfele. Der gjorde syskenbarna Sara Fjågesund Aase og Helge Sigurd Amdal Telnes frå Seljord folkemusikklag suksess med telespringaren dei dansa. Dei blei løna med 81 poeng, og viss dei oppnår ein poengsum høgare enn 75 på ein landskappleik til, rykker dei opp til A-klassa. Dei dansa også ein gangar, og denne blei premiert med 74 poeng, noko som tilsvara ein 8. plass. A-klassa blei i år vunnen av Hege S. Jonrud og Sigbjørn Rua som representerer Småjondølenes dansarlag.

Artikkelen held fram under annonsen.

Klasse A vokal, kvedarklassa, blei vunnen av Malin Alander, som representerte Oslofolk – Laget for folkemusikk. Beste vesttele av dei 15 tevlande blei Inger Lien, Falkeriset folkemusikklag, som enda på femteplass med lokalt stoff frå Møsstrond og Tinn; Skinnarlanden og Tinnsjøvisa.