Melder seg ut av partiet

I førre veke melde kommunestyremedlem og Høgre sin fyrste vara til Nissedal formannskap, Anne Tveit, seg ut av partiet. Etter å ha rykka fram frå 13. til 2. plass på Høgre si valliste hausten 2023, blei ho den andre frå partiet som kom inn i kommunestyret. Tveit fekk Olaus Sønderland som partifelle.

I utmeldingsskrivet som blei sendt leiaren i Høgre 4. februar, nemner Tveit at bakgrunnen for avgjerda er partiets samarbeid med Sp og KrF:

«Eg var ikkje kjend med at Høgre skulle samarbeide med desse partia då eg valde å stille meg på lista til kommunestyrevalet. Gjennom perioden frå valet 2023 og fram til i dag, meiner eg Høgre har ført ein politikk som er alt for lik Sp og KrF sin politikk. Dette samsvarar ikkje med mine synspunkt», skriv Tveit.