Reagerer etter formannskapsmøtet. – Det er nesten som å vise fingeren

For om lag to år sidan kjøpte Anja Pedersen og Terje Hunemo Håsum (gbnr. 52/4) med Nordbø/Skåli og flytta frå Sørlandet til garden i Fyresdal. Paret ynskjer å bygge fjøs for ammekyr, og har søkt kommunen om eit tilskot på 700 000 kroner. Landbruksrådgjevar Elin Skålid og kommunedirektør Ulf Pedersen tilrådde formannskapet å gje eit investeringstilskot på 350 000 kroner til fjøset.

Men – eit samrøystes formannskap (Ap og Sp) meir enn halverte summen, slik at tilskotet blir 150 000 kroner.

– Å ha ammekyr gjev på kort sikt null arbeidsplassar. Dette er nesten hobbyverksemd – å sponse med 350 000 kroner er eg veldig tvilande til. Det er null lønsemd i oppbygging av ammekyr, kvifor skal me støtte ulønsam verksemd i Fyresdal, sa ordførar Erik Skjervagen (Ap) i ordskiftet.