Kritiske til nedleggingsplanane. – Skjønar ikkje argumentasjonen

Saman med partileiar Trygve Slagsvold Vedum, Åslaug Sem-Jacobsen og dei to lokale senterpartipolitikarane Beate Marie Dahl Eide og Jarand Felland, hadde ho tatt turen til Seljord. Bakgrunnen er at sjukehuset Telemark til veka skal ta stilling til framtida ved Seljord distriktspsykiatriske senter. Toppe hadde lese den femten sider lange innstillinga der sjukehusdirektøren i Telemark tilrår avvikling, og hadde fleire merknader. 

Ho var blant anna oppteken av at både politikarane og helseministeren har vore klare på at talet på sengeplassar i psykiatrien skal opp. 

– Og då skjønar ikkje eg argumentasjonen for å leggje ned avdelinga, sa ho.

Klinikksjef for psykisk helsevern og rusbehandling ved sjukehuset Telemark, Kjetil Christensen, understreka at det ikkje var eit ynskje om å leggje ned avdelinga, men at dei ikkje hadde lukkast med å rekruttere ein psykiater, og at avvikling var ein konsekvens av det.

Kapasitet

I tillegg fortalde han at det i Telemark er god sengekapasitet innan psykiatrien.

Toppe lurte på kven dei da samanlikna seg med.

– Kanskje dei har eit underforbruk i dei andre sjukehusa, sa ho, og gjentok at det er nasjonale mål om å auke talet på sengeplassar i psykiatrien i Noreg. 

Christensen fortalde at døgnkapasiteten i Telemark er god samanlikna med andre sjukehus, og at ein i større grad nyttar seg av døgnbehandling her, enn andre stader. Han fortalde også at det ikkje var uvanleg med ledige senger. I Seljord har i snitt 6–7 pasientar nytta seg av dei 9 sengene på avdelinga. 

Les også: Har sendt brev til sjukehusstyret

Ragnhild tar kampen for DPS: – Det er heilt vilt!

Klinikksjefen sa at det ikkje berre var i Seljord det var slik, også på dei andre DPS-avdelingane var det om lag 70 prosent dekningsgrad.

Toppe understreka at 100 prosent belegg verken er realistisk eller ønskeleg, og meinte at 70 prosent belegg ikkje var så lågt i helse-Noreg.

Det kunne ikkje klinikksjefen skjønne. 

– Eg har jobba nokså mykje med beleggsprosent i norske sjukehus. Eg har følgt det over mange år. Det er derfor eg seier det eg seier, sa Toppe. Ho fortalde at 85 prosent var sett som ein fagleg standard, og at ho også hadde sett at det er nokså lett å trikse med slike tal, at det kjem litt an på korleis ein tel. 

Toppe sa at ho gjennom å lese saksframlegget hadde fått inntrykk av at nedlegginga ikkje berre skuldast at det er vanskeleg å rekruttere ein psykiater, men at det også var faglege og økonomiske grunnar til det.

Christensen understreka at han ikkje hadde noko innsparingskrav i si avdeling, og at det derfor ikkje var økonomiske grunnar til at avdelinga nå er føreslått avvikla.

Legg ned psykoseplassar

I dag er det 23 psykoseplassar i Telemark – 9 i Seljord og 12 i Porsgrunn. 

– Då blir det ein reduksjon på 40 prosent om du legg ned i Seljord, sa Jarand Felland. 

Han meinte at det var dramatisk.

Christensen fortalde at det i april vart oppretta sju nye døgnplassar i tryggleikspsykiatrien i Skien, og at det derfor var større kapasitet der. Det er også eit mål at to av plassane i Seljord blir flytta til ei av dei andre DPS-avdelingane. Han meinte at det vil vere tilstrekkeleg med døgnplassar totalt i fylket, også om plassane i Seljord blir lagt ned.

– Må sjå etter løysingar

Felland var oppteken av at det hadde kome søkjar til stillinga som psykiatar, og at det var vanskeleg å forstå at vedkomande ikkje hadde blitt tilsett.

– Me opplever at det ikkje er vilje til å tilsette nokon, sa Tokke-ordføraren. 

Det var ikkje klinikksjefen einig i. Han ville ikkje gå nærmare inn på det.

– Det er dei vurderingane som me har gjort. Om me hadde meint at det er noko me kan gå for så hadde me gjort det, sa han.

Felland etterlyste vilje til å sjå på alternative løysingar for å rekruttere. 

– For det er jo ikkje slik at om me ikkje får tak i sjukepleiarar til ein sjukeheim så legg me han ned. Då må me sjå etter løysingar, sa han og fortalde korleis Fyresdal hadde løyst legekrisa med å tilsette legar i nordsjøturnus.

I saksframlegget er sjukehuset kritisk til ei slik løysing, blant anna for at pasientar då må forhalde seg til fleire legar gjennom ei innlegging. 

Toppe meinte denne frykta var overdriven. Ho hadde forståing for at det er mangel på helsepersonell, men meinte at ein ikkje kunne akseptere sentralisering av helsetilbod av den grunn. 

– Om ein ynskjer å ha den strukturen, så må ein leite etter løysingar, sa Trygve Slagsvold Vedum.

Han ville gjerne ha tips om det var noko politikarane på Stortinget kunne gjere for at det skulle bli meir attraktivt for helsepersonell å jobbe ute i distrikta. 

Les også:

Til veka blir framtida til Seljord DPS avgjort. Dette er innstillinga til sjukehusdirektøren