Open skule i Åmot

Eit barn og to vaksne viser fram papirarbeid ved eit bord innandørs.
Frå venstre Åne Fuglesteg, Ingebjørg Bråstøyl og Steinar Hovden Lier frå 5. klasse selde tennbrikettar dei hadde laga av avispapir og voks.

Gjer elevane bevisste på verda utanfor Noreg

Elevane ved Åmot skule har lagt ned ein stor innsats for årets TV-aksjon. «Open skule» onsdag kveld gav om lag 42 000 kroner i kassa. Med arbeidsdagen til ungdomsskulen har dei samla inn om lag 57 000 kroner.

Torleiv Berdal
Publisert

Rektor Gisle Bonna Espedalen ved Åmot skule var spent før folk kom til «Open skule» onsdag kveld. Resultatet kunne han vera godt fornøgd med. Elevane samla inn om lag 42 000 kroner.

Årets TV-aksjon går til NRC Flyktninghjelpa. Åmot skule tjuvstarta innsamlinga med sal av lodd, pylser, kaker, kort, popcorn, saft, nøkkelringar og mykje anna på skulen.

Frammøtet var godt, og fleire generasjonar kom for å støtte årets TV-aksjon 18. oktober. Tek ein med arbeidsdagen fredag, der ungdomsskuleelevane arbeider inn minst 300 kroner kvar, har skulen samla inn om lag 57 000 kroner på dei to tiltaka.

Folkemengd samlar seg i ein lys bygning med galleri og fleire etasjar.
Det var folksamt på skulen denne kvelden. Her frå vestibylen på skulen.
To personar står saman innandørs; den eine held eit bakverk.
William Gripne Kyed frå 9. klasse og kontaktlærar Bahrat Sharma, som selde kaker og saft.
Gut med svart T-skjorte held to kort i ein foajé.
Olai Ormestøyl Nevestveit frå 4. klasse lika å stå og selje kort.
Kvinne står ved ei dartskive i eit lokale med plakatar i bakgrunnen.
Karianne Hustveit Tjønn frå 10. klasse snurra hjulet på denne stasjonen, der ein kunne vinne sjokoladeplater. – Det har vore bra sal og trøkk her, fortalde ho.
Personar sel innpakka bakst frå bord med handskrivne prisskilt.
Bakerst Gunnar Sandok Ringhus. Framme frå venstre Halvard Ringhus Bjåen og Halvor Holte Hylland frå 7. klasse. Dei hadde poppa popcorn nesten heilt fram til arrangementet opna og selde det saman med saft.
Fargerike teikningar og kort ligg spreidde utover eit bord.
Sjølvlaga kort var noko av det ein kunne skaffe seg denne kvelden.
To kvinner sit ved eit bord med kaffikoppar og papir i eit lyst lokale.
Marit Gravir (t.v.) og Tone Kostveit. Dei er forelder og oldemor til ein elev ved skulen og hadde slått seg til ro i kantina under arrangementet. – Det er mange ukjende for meg her, sjølv om eg har vore her fleire år no, men kjekt å vera er det, sa Kostveit.

Lærer om verda

Espedalen har vore tilsett ved Åmot skule sidan mars og har vore med på mange skulearrangement for TV-aksjonen gjennom åra. Men «Open skule», slik Åmot har arrangert det i fleire år, hadde han ikkje vore med på før.

– Me håpar at elevar, foreldre, besteforeldre og til og med oldeforeldre kjem i kveld og støttar ei god sak og den fine innsatsen elevane har lagt ned med å lage ymse ting ein kan kjøpe. Alle klassetrinna ved skulen er med, og eg håpar folk får ein hyggjeleg kveld, sa Espedalen nokre minutt før dørene opna.

Skulen var full av besøkande denne kvelden. Engasjerte elevar gjorde sitt beste for å selje mest mogleg. Næringslivet i Vinje hadde òg gjeve fine premiar som dei frammøtte kunne vinne i lotteriet.

Tone Kostveit (84) fortalde at elevane ikkje berre engasjerte seg fordi skulen hadde bestemt det.

– Oldebarnet mitt har snakka om denne kvelden i ei veke, så dette har ein gleda seg til. Eg har vore på dette arrangementet i fleire år no og synest det er kjekt å vera her, sa Kostveit.

Espedalen fortalde at skulen mellom anna prøvar å gjera elevane bevisste på verda utanfor Noreg gjennom undervisninga. Difor passar det godt å arrangere ein slik kveld.

– Å arbeide saman med andre for ei sak som er større enn ein sjølv, håpar eg blir ei verdifull oppleving for elevane, sa Espedalen.

nyhende
Powered by Labrador CMS