Sommar med VTB

Papiravisa til VTB på ein torsdag?! Ja, slik blir det også i juli i år. Frå neste veke vil me framleis gje ut papiravis i juli, men me samlar tysdags- og fredagsavisa i ei torsdagsavis. Det betyr ein tur mindre i postkassa i veka, men me lovar at det ikkje skal bli noko mindre journalistikk i avisa i juli. Juli-avisene til VTB blir fyldigare enn dei to utgåvene i veka lesarane var vande med frå somrane tidlegare. Tilbakemeldingane var gode då me i fjor valde denne løysinga.

Det blei litt støy då VTB i 2016 gjekk frå tre til to aviser i veka. Fleire frykta ei dårlegare lokalavis med mindre journalistikk. Snart fem år etter er meldingane frå lesarane at det var eit klokt val. Men at me nå samlar dei to avisene til ei stor sommaravis betyr ikkje at dette blir ei permanent løysing. Så lenge nokon kan distribuere avisa, vil me framleis kome ut på papir to dagar i veka. 3. august er VTB tilbake med avis tysdag og fredag.

I dagens avis er det om lag 15 sider annonsar. Når juli-månad startar, er det som ein brytar blir skruva av. Sommaren er ein pause for mange. Det politiske livet tek fri, annonsørane er færre, og mange av dei store helgearrangementa er avlyste også i år. Økonomi og distribusjon er andre argument for at det blir vekeavis i juli.