Ny regjering må levere i distrikta

Fredag blei det som venta slått fast at Arbeiderpartiet og Senterpartiet skal danne ny regjering. Onsdag skal dei legge fram regjeringsplattforma – presentasjon av politikken Ap og Sp vil satse på framover.

Det einaste me veit til nå på det området er at dei to partia i regjeringsforhandlinga er samde om full momskompensasjon til frivillige organisasjonar som til dømes idrettslag. Det er på tide. Semje om full kompensasjon er ein god start på å servere gladsaker som me bør vente fleire av framover, ikkje minst i distrikta.

Sp er kjent for å ville satse på distrikta, og kjem garantert til å stå på for at også Ap skal fylgje ei slik linje framover. Men då må dei to partia ikkje kome med fleire utrulege «distriktstiltak» – eit døme som sist raud-grøne regjering vedtok; frå 2010 måtte fylkeskommunane overta ansvaret for fylkesvegane. Å gje ei slik gåve burde aldri vore gjort før fylkesvegane fyrst hadde blitt rusta opp – på statens kostnad.