Endeleg går det rette vegen

Det er nok få riksvegar i Noreg som år etter år har hatt så mange elendige strekningar som Rv41. Denne Telemarksvegen som går frå Kristiansand og endar i vegkrysset ved E134 i Brunkeberg, blei i årevis kalla «Den gløymde riksvegen». Det fordi det kom aldri bra med midlar for å ruste opp ulike strekningar som var ei plage for vegfarande. I 2018 stod Rv41 på lista til NRK som den eine av dei ti verste riks- og fylkesvegane i landet.

I nokon år nå har ordførarane i kommunane der Rv41 går, stått saman for å prøve å få tak i pengar til opprusting. I 2014 var ordførargjengen til Oslo og møtte telemarkingen og stortingsrepresentant Bård Hoksrud (Frp), som då var statssekretær i Samferdselsdepartementet. Sjølv om han på den tida var ein av dei mektigaste vegpolitikarane i Noreg, og i lang tid hadde snakka varmt om Rv41, fekk ordførarane ingen lovnader med seg i kofferten då dei skulle heim att.

Det var i ferd med å kome ei løyving på 490 millionar kroner i ny Nasjonal transportplan frå 2017. Forslaget om ein slik stor sum fordelt på strekninga Treungen–Vrådal og ei strekning i Agder, kom frå Statens vegvesen. Om ikkje dei hadde vist stor satsingsvilje på Rv41 i årevis før, kom instansen ved dette høvet skikkeleg på banen. Men så sette regjeringa på handbremsa – heile summen blei stroken – kroner null til Telemarksvegen.