John blei heidra for innsatsen i idrettslaget. – Saman har me fått til mykje

Lars Gunnar Veum, som er ny leiar av Nissedal IL, heidra Thronsen med desse orda:

«Det er lite som er viktigare å feire enn frivilligheita. Det einaste me eigentleg har til odel og eige er tida vår, og det å ofre den for å bidra til eit fellesskap er heilt enormt stort. Om det er å bygge ballveggar, køyre flyttelass, skrape betong, eller å tømme ein kaffikopp, er det livsviktig for eit bygdesamfunn at ein stiller opp. Det er ikkje sjølvsagt i ein travel og moderne livsstil at ein skal kunne ha overskot av tid og energi til å stille opp. Difor er det desto finare og sterkare å bidra. Det blir ingen idrettslag utan frivilligheita. Det blir ingen ballbingar og ingen trimparkar. Det blir ikkje bygdesamfunn utan frivilligheita. Difor meiner eg at det er eit privilegium og ei sjølvsagd sak å feire og setje fokus på dei som vel å bruke tida si på andre.

Ein som har brukt mykje tid på bygda si, er John Thronsen. Han har sete i 15 år som leiar av Nissedal idrettslag og endå fleire år i styret i perioden før. Dette fortener heider, ære og eit æresmedlemskap i Noregs flottaste idrettslag.