Nesten all norsk datasenterkapasitet er eigd av utlendingar: – Utfordrar nasjonal tryggleik
(NPK-NTB-Anna Nesje): Ein ny rapport frå Teknologirådet viser at over 90 prosent av kapasiteten ved norske datasenter har utanlandske eigarar. – Sentera gir avgrensa verdiskaping, seier leiaren av rådet til NRK.
I Teknologirådets rapport går det fram at 90,6 prosent av norsk datasenterkapasitet er utanlandskeigde, ifølgje NRK. Administrerande direktør Sverre Gotaas ved Herøya Industripark i Porsgrunn er òg leiar for Teknologirådet. Han seier at når byggjeperioden er over, med mange arbeidsplassar, blir det lite igjen til lokalsamfunnet.
Ifølgje rapporten, som blir lagt fram om kort tid, er verdiskapinga mykje lågare enn i tradisjonell industri.
– Dessutan er det lite som tyder på at dei etablerer seg i Noreg for å oppfylle målet til regjeringa, seier Gotaas.
– Skil ikkje
Strategien til regjeringa krev at datasentera skal styrkje norsk beredskap. Men den store delen utanlandske eigarar utfordrar tvert imot både nasjonal tryggleik og økonomi, ifølgje Teknologirådet, som blir utnemnd av regjeringa for fire år av gongen.
Med systemet i dag skilst det ikkje mellom kven som får tilgang til straumen. Dei som er raskast ute, får kontraktane.
Annonse
– Her stiller ein alle likt i nettkøen, anten det er Google, Tiktok eller eit datasenter som er heilt sentralt for helsedata, seier han.
Nettopp Google er eit av selskapa som har fått grønt lys. Datasentera deira står snart klare til bruk i Skien.
Krev konsesjonssystem
Blant partia som er sterkt kritiske til storskalautbygging av datasenter her i landet, er SV.
– Dette byrjar å likne på det største kraftranet i noregshistoria. Vil vi verkeleg at utanlandske kapitalistar skal byggje datasenter og tene på det, medan norsk næringsliv blir sitjande igjen med endå høgare straumrekning? spør Lars Haltbrekken.
Partiet krev til liks med MDG og Raudt omgåande etableringsstopp for datasenter inntil eit strengt konsesjonssystem er på plass.
– Norsk areal og norsk kraft skal komme folket til gode, ikkje nokon få tekoligarkar.
Digitaliserings- og forvaltingsdepartementet har ikkje teke imot sjølve rapporten enno og kan difor ikkje vurdere funna enno. Statsråd Torgeir Micaelsen (Ap) skriv i ein e-post til NRK at Noreg skal vere attraktivt for datasenter som bidreg til verdiskaping, tryggleik og norske interesser.
– Arbeidarpartiets landsstyre har vedteke at vi vil vurdere kriterium for etablering, betre kontroll og strengare energikrav, skriv han.
(©NPK)
