Diagram med slektsledd i boksar og to raude diagonale strekar over.
Diagrammet viser nær familie som hadde unntak frå buplikta ved overtaking av hus i Vinje. No er dette slektskapsunntaket fjerna.

No blir det buplikt for nær familie også

Nær familie som søner, døtre, barnebarn, svigerbarn og svigerbarnebarn har hatt unntak frå buplikta når dei overtek bustad i Vinje. No blir det slutt på det.

Åshild Emma Solbjør Journalist
Publisert

Det såkalla slektskapsunntaket skapte debatt i kommunestyret tysdag, og ti representantar gjekk på talarstolen for å seie kva dei meinte.

Nokre hadde forståing for at barn ønskjer å behalde barndomsheimen sin sjølv om dei har flytta bort, men meinte at det må vege tyngre at folk som faktisk vil bu her kan få ein stad å bu. 

– Det er viktig for trivselen i bygda at hus ikkje blir ståande tomme, sa Irja Godal (Bygdelista).
Både hus i byggefelt og hus med store tomter som nesten kan reknast som småbruk kan i dag bli fritidsbustadar med slektskapsunntaket. – Det at ein skal beslaglegge slike typar bustadhus til fritidsføremål, det synest eg ikkje noko om, sa Ane Killingtveit (Sp)..
– Det hadde vore sympatisk om ein kunne valt å berre ha unntak for barn, men det er ikkje mogleg juridisk, sa Nils Johan Svalastog Garnes (SV).
Bjørn Fetveit (INP) ville vite om vedtaket vil ha tilbakeverkande kraft, altså for dei som alt har overteke eigedom frå nær slekt. Det vil det ikkje ha, det vil gjelde fram i tid, var svaret frå ordføraren.
– Eg synest dette er ein voldsom inngripen i eigedomsretten, og eg trur at omdømet til Vinje kommune blir skadelidande på sikt, sa Svein Henry Ekre (Ap).
– Det kunne kanskje vore mogleg å gjere unntak for eitt slektsledd, men når det går ein generasjon som ikkje har budd der så blir det buplikt, undra Bjørn Svalastoga (Bygdelista). Men det går ikkje an, svarte ordførar Jon Rikard Kleven (Sp). – Lova opnar ikkje for nokon krumspring der.
Liv Bente Tvenge (H) ville at konsekvensar av å fjerne slektskapsunntaket skulle utgreiast. Ho fremma forslag om dette, men trekte dette att.
– Ja, det er inngripande, sa Tone Edland (Sp). – Men det strengaste me har gjort er jo den nullgrensa, der me har sagt at på alle bustadhus er det evig buplikt.
– I dag har me ein politikk der bustadar i etablerte bustadfelt har blitt fritidseigedomar, Det er ikkje berekraftig på sikt, sa Bjørnar K. Christensen (Bygdelista).

Andre skulle ønske at ein kunne skilje mellom ungar og anna nær slekt – men det er det ikkje høve til juridisk sett.

Nokre meinte også at fjerning av slektskapsunntaket er altfor inngripande, og at det vil skade omdømet til kommunen.

Nesten delt på midten

Då det var tid for røysting, delte kommunestyret seg nesten på midten – 14 stemte for og 11 mot fjerning av slektskapsunntaket.

På fleirtalssida var heile SV og Bygdelista, fem Sp-representantar og ein DNI-representant. 

På mindretalssida var heile Ap, H, INP og Frp, to DNI-representantar og tre Sp-representantar.

Fleire raritetar i regelverket

Dette er truleg ikkje siste kapittel i bupliktsoga i Vinje.

Tone Edland (Sp) hadde mykje på hjartet om bupliktsmutthol då saka vart drøfta i PMU-møtet 28. oktober.

Då ho var på talarstolen, trekte utvalsleiar Tone Edland (Sp) fram fleire forhold i bupliktregelverket som ho og andre i planutvalet undrar seg over – til dømes at det berre er fem års buplikt på større landbrukseigedomar.

– Nå har eg budd så lenge på Uppigard at eg kan flytte og ha det som hytte, og berre få nokon til å drive jorda for meg, medan i eit vanleg bustadhus må du bu for evig og alltid, sa Edland.

– Det er veldig rart, la ho til.

Noko anna ho synest er pussig, er at buplikt kan oppfyllast utan å faktisk bu i huset.

– Du kan bu kvar som helst, berre du har meldt flytting til kommunen. Så det er mange ting med dette her som er merkeleg og som ikkje heng heilt i hop.

Plan- og miljøutvalet hadde ein lang diskusjon om desse tilhøva i sitt møte den 28. oktober, og Edland opplyste om at utvalet har bede administrasjonen førebu ei ny sak som ser nærare på regelverket for buplikt og ulike smutthol i dette.

tone edland kommunepolitikk vinje buplikt nyhende kommunestyret
Powered by Labrador CMS