Val 2025 er i gang:– Veldig stas at så mange var innom den første dagen

– Det var god flyt i heile går.

Det seier Marianne Eikland, konsulent og val-ansvarleg på kommunehuset i Seljord, tysdag. 

Måndag opna førehandsrøystinga til Stortings- og sametingsvalet 2025. Eikland fortel at det kom folk innom støtt og stadig.

– Det stod nokon og venta på oss då me opna. Dei fleste seier at det er greitt å få det unnagjort.

Folk i alle aldrar

Måndag 8. september er valdagen. Skal du førehandsrøyste må du gjere det mellom 11. august og 5. september. Ein kan røyste i den kommunen ein sjølv ønskjer, så lenge ein har med seg legitimasjon.

– Eg bur sjølv i Kviteseid, men har røysta her i Seljord, fortel Eikland.

Ho tør ikkje talfeste kor mange som var innom kommunehuset måndag, men trur det kan ha vore mellom 20 og 30.

– Det var folk i alle aldrar.

Mange er ivrige

– Det var overraskande og veldig stas at så mange var innom den første dagen.

Det seier Vivi F. Smidesang, som er val-ansvarleg i Vinje kommune.

– Det er kjempekoseleg at så mange er ivrige på å førehandsrøyste. Det var eit jamt tilsig heile dagen her i Åmot.

Godt over 20 var innom måndag, og dei første kom alt klokka åtte.

– Eg har snakka med folk på kommunehuset som har vore med på val her tidlegare, og dei seier at til å vere den første dagen var det eit veldig godt oppmøte, fortel Smidesang.

Ho trur mange nyttar høvet til å stemme når dei først er i sentrum for å handle.

– Me oppmodar folk til å engasjere seg og bruke stemmeretten. Me sit klare heile dagen nå, og det er gledeleg å oppleve at så mange førehandsrøyster. 

Ved sist stortingsval kom heile 58 prosent av røystene før valdagen, og andelen har stort sett auka ved kvart val.