Trym fekk fangst på den årlege fisketuren

Fyrsteklassingen Emil Minde sit tålmodig med pilkestanga. Han fortel at han har prøvd isfiske før, men det har blitt dårleg med fisk. 

– Ingen fisk og ingen napp, seier han. 

Men han gjev seg ikkje. 

– Nå har eg bestemt meg for å få, seier Emil lurt. 

Klassekameraten hans Sølve Mostøyl Bjaaland sit like tålmodig ved naboholet. Men heller ikkje Sølve har fått verken fisk eller napp. Sølve fortel at han var på isen under vintermarken i fjor også og prøvde å fiskelykka. 

– Det er moro, seier Sølve. 

Tryte på kroken

Denne helga er vintermarken i Kviteseid, og fredagen inviterer Kviteseid jeger- og fiskeforeining heile skulen på isfiske. Det kryr av både store og små på isen, og det store spørsmålet er sjølvsagt  – blir det noko fisk? 

– Nei, svarar ein jentegjeng frå 6. klasse. 

4. klassingane Mathea Nødland Danielsen og Selma Johre sit tett i tett med kvar sin pilkestong, men heller ikkje dei har fått napp. 

– Det var ein som fekk ein bitteliten fisk i stad, fortel Ingeborg Lykseth Botnen. 

Men sjølv har ho ikkje fått fisk på kroken. 

– Nei, det er heilt umogleg, seier ho. 

Idet ho har sagt det bryt det ut jubel og rop rett ved sia. Trym Steinbakk sveivar og sveivar. Han har fått fangst!

Snart dukkar det opp ein sprellande, ganske liten abbor som har bite på kroken. Den vesle abboren, eller tryta, får ein god gjeng med forsvarar hos publikum. Den er for liten! Kast den uti att! 

Men, nei, protestane når ikkje fram. Tryta har svømt sine siste tak i Sundkilen og Trym kan fornøgd vise fram dagens fangst.