Slik slår forslaget frå skattekommisjonen ut for ulike inntektsgrupper
Personar som tener mest, vil framleis betala høgast prosentdel av inntekta i skattar og avgifter. Dei får likevel høgast skattereduksjon i kroner.
Skattekommisjonen har rekna på effekten av redusert trygdeavgift og auka personfrådrag for ulike inntektsgrupper.
Den rikaste gruppa er dei over 17 år som har ei bruttoinntekt over 1,16 millionar kroner i året. Med forslaget frå skattekommisjonen vil dei få 9200 kroner mindre i skatt og betala i snitt 35,6 prosent skatt.
Den nest rikaste gruppa, med inntekt mellom 900.000 kroner og 1,1 million, vil ha snittskatt på 27,5 prosent og reduksjon i skatt på 6600 kroner.
Personar med inntekter mellom 320.000 og 900.000 kroner i bruttoinntekt vil få snittskatt på mellom 19,3 og 24,4 prosent. Det vil svara til mellom 4000 og 5800 kroner mindre enn før, i snitt.
Den lågaste inntektsgruppa, personar med under 179.000 kroner i bruttoinntekt, betaler 2400 kroner i skatt i snitt, nær uendra, med dei nye forslaga.
(©NPK)
