Lars Jakob vil gjere det enklare å selje og kjøpe viltkjøt

Lars Jakob Aarak har vekse p på gard i Treungen.

– Og friluftsliv og jakt har alltid vore min store lidenskap, seier han.

Aarak jaktar elg og rein i heimbygda, og har også vore ein del på hjortejakt på Vestlandet. Nå vil han gjere det enklare å både selje og kjøpe lokale råvarer. 

– Utrygt for både kjøpar og seljar

I dag opplever han at kjøp og sal av viltkjøt ofte skjer uformelt – gjennom meldingar, kjenningar eller i lukka grupper. 

– Dette gir lite oversikt og kan vere utrygt for både kjøpar og seljar, meiner Aarak som tidlegare i desember starta den digitale marknadsplassen viltbutikken.no.

På nettsida kan jegerar som har kjøt til sals leggje dette ut, samstundes som interesserte kjøparar kan registrere seg. På den måten vil Aarak setje jegerar som har viltkjøt til overs i kontakt med personar som ønskjer å kjøpe lokalt kjøt. Både privatpersonar og profesjonelle aktørar kan slik få lettare tilgang til lokale råvarer, meiner han.

Marknadsplass – ikkje nettbutikk

Viltbutikken er ein marknadsplass, og ikkje ein nettbutikk, understrekar initiativtakaren. På heimesida kan ein som ønskjer å kjøpe rype, hare eller elgkjøt kome i kontakt med jegerar som har desse råvarene. Deretter må kjøpar og seljar sjølve avtale levering og betaling.

For at kjøtet skal vere handtert på rett måte, tilrår Aarak at dei som skal selje kjøt nyttar godkjende viltbehandlingsanlegg for skjering, pakking og kontroll av storvilt før vidaresal.

Stor interesse frå start

Plattforma vart lansert i midten av desember, og interessa har vore stor heilt frå start.

– Fleire hundre har registrert seg som aktuelle kjøparar, fortel Aarak.

Jaktsesongen var på hell då plattforma vart lansert, men det var eit bevisst val. No vil han bruke tida fram mot ny jaktsesong på å byggje vidare på konseptet og få fleire jegerar med. 

Vil utvide til fleire naturprodukt

Planen er å utvide konseptet til også å omfatte andre naturbaserte råvarer. Enten frå lokale gardbrukarar eller gardsbutikkar, eller frå privatpersonar som har naturprodukt å selje.

– Som blåbær, honning eller kantarellar, seier Aarak.

Han meiner slike lokale varer bør vere meir tilgjengelege, og håpar plattforma kan gjere handelen enklare, tryggare og meir oversiktleg for både seljar og kjøpar.

Gjennom viltbutikken håpar han også at restaurantar og andre kan finne lokale råvarer og leverandørar med ei tydeleg historie og eit klart opphav, til dømes elg eller rype frå Vest-Telemark. Samstundes vil han sjå på nye løysingar for korleis varer kan bli bestilt, samordna og levert ut på ein betre måte framover.

Aarak ser også på om han gjennom viltbutikken kan tilby viltkveldar, kurs innan ulike fagfelt og samarbeid med større aktørar. 

– Mat og gode opplevingar går ofte hand i hand, og dette er eit område me gler oss til å utvikle vidare, seier han. 

Vil bidra til lokal verdiskaping

I startfasen vil det vere gratis å bruke plattforma, men på sikt håpar Aarak at ho kan gi noko inntekt.

Aarak bur i dag i Oslo og jobbar som eigedomsmeklar, men planen er på sikt å flytte heim att til Treungen for å ta over garden. Han håpar at viltbutikken skal bidra til lokal verdiskaping.