Bustaden har stått tom i meir enn eitt år. Nå vil kommunen selje

Formannskapet i Seljord er torsdag tilrådd av kommunedirektøren til å selje ein leilegheit i Sterke-Nils-vegen, og at kommunedirektøren får fullmakt til å gjennomføre salet. I saksutgreiinga kjem det fram at leilegheita av meklar blir vurdert som attraktiv i marknaden, og at forteneste frå salet blir sett av til ubunde investeringsfond og bruka til eigenkapitaltilskot i KLP dersom ikkje det blir selt nok tomter til å dekke eigenkapitaltilskotet.

Kjøpt for to millionar

Leilegheita i Sterke-Nils-vegen er bygd i 2004. Den har eit bruksareal på 58 kvadratmeter, har to soverom, gang, kjøkken/stue, bad og bod. Den blei kjøpt for to millionar kroner i 2021. Det var då eit behov for ein sentral og universelt utforma leilegheit i samband med ei konkret busetting. Nå har ikkje leilegheita vore leigd ut sidan desember 2023.