70 skiskyttarar samla i Fyresdal i helga

Det gror godt i skiskyttarmiljøet. Det var tilbakemeldinga frå både IL Dyre Vaa og Fyresdal skiskyttarlag. Begge klubbane har nå fleire aktive skiskyttarar enn på mange år. 

Ei av dei som går sin første sesong er Miriam Hustveit Tjønn. Ho er ni år, kjem frå Særensgrend, og går for Dyre Vaa. Dette er det andre skiskyttarrennet hennar.

– Eg var med på eit renn i Rauland før jol også, fortel ho. 

Miriam er fornøgd med løpet sitt, kanskje særleg med skytinga. Ho trefte blink på ni av ti på laurdag.

Har gått skiskyttarskule

I Fyresdal skiskyttarlag har det også vore god rekruttering. Seks unge skiskyttarar har gjennomført skiskyttarskule, der både dei og foreldra har fått grunnleggjande opplæring i sikkerheit og våpenbruk i haust. Fire av dei kjem frå Tokke. 

Marius Fles Brubakk og Peder Tøndel Solli kjem frå Dalen. Annbjørg Omland Brokka og Lilly Seltveit frå Skafså, men dei trenar i Fyresdal ein kveld i veka. Og alle stilte på startstreken då klubben arrangerte renn på heimebane. 

På heimebane var også Noah Brattsberg-Aamlid og Tor Ola Momrak Breivik. Fyresdalsgutane fortel at det er to treningar i veka, men at dei berre rekk å vere med på éi.

– Me driv med andre ting også, seier dei, og fortel om både fotball og skyting.

Skicross

Rennet i Fyresdal var eit skicross-renn for dei under 16, med både ei lita slalåmløype og orgeltramp. Det skulle også ha vore eit hopp, men det kutta arrangørane ut sidan føret var skarpt. Regn på fredag og kuldegrader laurdag førte til at det var hardt ute i sporet.

Stor dugnadsvilje

Førti funksjonærar var i sving for å få gjennomført rennet.

– Me er veldig heldige som har med oss bygda på dette, seier rennleiar Bjørn Bergheim som rosar bygdefolket for stor dugnadsvilje.

Han fortel at det nå er 18 aktive skiskyttarar med i skiskyttarlaget til Fyresdal, og at 16 av desse gjekk rennet laurdag.