Nissedal kommune må sjølv definere økonomiske vilkår for solkraftproduksjon!

Det har blitt skrive ein god del i VTB om landbasert solkraftproduksjon i Nissedal og meir kjem det helt sikkert til å bli. Dette fordi det i større eller mindre grad vil påverke framtida til alle som bur i kommunen. Det er lett for dei fleste av oss å vera einig i at meir fornybar energi er noko vi treng. Spørsmålet er til kva for pris? Her er det ikkje berre snakk om pris i økonomisk forstand, men og kva det vil koste i form av nedbygging av natur og visuell støy. Ein må ha respekt for at ikkje alle synest det er vakkert å sjå på solcellepanel, vindmøller, eller hytter ute i naturen for den saks skuld. Mitt inntrykk er at folk flest har blitt meir bevisst på dette dei siste åra, og det meiner eg er bra! Når det er sagt vil dei færraste heller ikkje stoppe vidare utvikling så svaret ligg i å finne ein gylden middelveg.

Om Nissedal kommune skal stille areal tilgjengeleg for solkraftproduksjon meiner eg at innbyggjarane må få sin rettmessige del av verdiskapinga dette bidreg til for ulempene det medfører. Skattesystem vi har i dag ivaretek ikkje dette på ein god måte. Til dømes blei det i 2022 innført ei produksjonsavgift på landbasert vindkraft på 1 øre per kWh og auka i 2024 til 2 øre per kWh. Avgifta blir først betalt til staten, og deretter utbetalt til kommunane gjennom ein fordelingsmodell via NVE. Etter ei endring i 2019 tillet heller ikkje regelverk å inkludere såkalt produksjonsutstyr og installasjonar i eigedomsskattegrunnlaget. Alt dette betyr i praksis at Nissedal kommune vil sitte igjen med svært lite ekstra direkte inntekter frå framtidig solkraftproduksjonen om ikkje dagens regelverk blir endra. Det meiner eg ikkje er rett og er derfor veldig betenkt med å seia ja til dette!

I delar av Nissedal kommune ligg forholda godt til rette for å produsere solkraftenergi. Dette har vi fått stadfesta ved at Å Energi og Pyur Energy allereie har starta ein prosess. Eg synest solkraft i Nissedal er spennande og trur at dette kan bidra til fleire positive ringvirkningar for kommunen som allereie belyst i nylig lesarinnlegg frå Nissedal Høgre og andre. Men, dette må skje på ein skånsam måte for natur og plassering av anlegga må vere på ein stad som gjer at dei ikkje er til for stor sjenanse for folk i kommunen. Det er derfor veldig bra at ordførar og administrasjon i Nissedal kommune planlegg eit folkemøte om solkraft slik at folk kan kome med innspel. Fram til skattesystemet blir endra er mi anbefaling at Nissedal kommune går i direkte forhandlingar med aktuelle aktørar. Det må krevast ein avtale som sikrar kommunen ein type produksjonsinntekt på 4-5 øre per kWh produsert. Dette er ei avgift på nivå med det kommunar med landbasert vindkraftproduksjon mottek i dag. Dette vil kunne gje Nissedal kommune ei ekstra inntekt på 3 – 5 millionar i året pr km2, eller 1 000 mål, som ein bruker til solkraft. Om interesserte energiaktørar aksepterer ei avtale som dette meiner eg utan tvil at Nissedal kommune vil vera tjent med å støtte at nøye valde område blir brukt til produksjon av fornybar energi!