Meiner dei bør avvikle selskapet
Kommunedirektøren i Tokke rår politikarane til å stemme for å avvikle Vest-Telemark næringsbygg AS.
Publisert
26. januar var det eigarmøte i Vest-Telemark næringsbygg (VTN), og etter initiativ frå Seljord-ordføraren vart selskapet bedd om å greie ut dei to spørsmåla – vidare drift, korleis meiner administrasjon/styret at selskapet best drivast vidare og avvikling av selskapet, korleis kan det gjerast?
Det vart ikkje gjort noko vedtak i saka, men nå kjem saka altså opp til handsaming i kommunestyret i Tokke. Dei skal ta stilling til saka i kommunestyret fyrstkomande tysdag. Kommunedirektøren rår politikarane til å stemme for at selskapet blir avvikla.
Vanskeleg å sjå for seg ei aktiv rolle i eigedomsutviklinga
I vurderinga frå kommunedirektøren står det mellom at «direkte kommunalt eigarskap i aksjeselskap handlar om å forvalte innbyggarane sine verdiar på best mogleg måte – det må kort sagt vere eit tydeleg definert formål, og formålet må stø opp om å sikre gode tenester, samfunnsoppdraget og politisk styring.»
Annonse
Etter spørsmåla frå Seljord-ordføraren fekk Telemark næringshage i oppdrag å gjere ei utgreiing av desse to spørsmåla. Kommunedirektøren peikar på eitt av punkta i denne rapporten som handlar om å betra ressurstilgang for ei meir utviklingsorientert framtidig drift.
Kommunedirektøren skriv at «sjølv om dette skulle kome på plass, kan ein likevel tenke seg at enkeltprosjekt likevel vil vere avhengig av kommunalt medeigarskap i dotterselskap eller annan finansiell trygging frå ein vertskommune/god dekning av framtidig hovudleigetakar før ei investeringsavgjerd kan takast.»
Og konkluderer med at det er vanskeleg å sjå for seg at VTN kan ta ei aktiv rolle innafor eigedomsutvikling i dei sju eigarkommunane.
