Gjennom hausten og vinteren vil Ingrid halde lesarane oppdaterte på førebuingane til Femundløpet

Etter Femundløpet for to år sidan bestemte eg meg for at me skulle ha eitt års pause frå å trene til hundeløp, før me på nytt skulle begynne å tenkje Femund igjen. Eg hadde i mellomtida eit valpekull på seks, der eg beheldt fire og vier tida til dei. No har dei blitt gamle nok til å kunne vere med for fullt, og det blir spanande å sjå korleis dei taklar treninga framover, både fysisk og mentalt.

Planen er å starte i 450 km-klassen i februar, målet er å fullføre.

August er månaden dei fleste som har eit hundespann i hagen, startar med treninga for sesongen. Sesongen varer frå august til, er me heldige, kanskje heilt til mai. August er også ein månad med varierande temperaturar, noko som gjer at trening enten føregår seint på kvelden eller tidleg på morgonen, når det er kaldt nok. Hundane er polare pelsdottar, og gradestokken bør helst vise under ti grader før trekkelen kjem på. Målet mitt om fire økter i veka, rauk alt første veka. Fortsetjinga gjekk noko betre. I august er det korte, lette økter som står på menyen. Bygge seg sakte opp att etter ein lat sommar, før ein etter kvart kan auke distansen.