Ut med «Krossen», inn med «Krysset». – Eg har landa på at eg skal stole på raulendingane i denne saka

Namnesaka om Rauland, Krysset og Krossen blei handsama i plan- og miljøutvalet (PMU) i fjor vår, og vart lagt ut på høyring. Berre fire høyringsuttalar kom inn, så i forkant av andre runde i PMU i fjor haust la utvalsmedlem Irja Godal (Bygdelista) ut eit spørsmål om saka på Facebook. Ho fekk over 80 svar, og mønsteret var tydeleg: Dei med røter i Rauland sa «Krysset», medan dei utanfrå sa «Krossen». Eit nesten samrøystes PMU vedtok dermed at tettstaden skal heite «Krysset» og bygda «Rauland». 

Vanlegvis har PMU vedtaksmynde i slike namnesaker, men sidan dette er så sentrale namn i bygda skulle saka også til kommunestyret, og dit kom ho førre tysdag. Då gjekk Godal på talarstolen att og fortalte om den uhøgtidelege Facebook-høyringa si. Vidare forklarte ho at området der vegkrysset vart bygd attende på 20-talet høyrde til garden Jore, og at ho hadde snakka med Aslaug Jore som kjem derifrå og som dessutan er veldig interessert i gamle stadnamn.

- Då ho vaks opp, og ho er fødd i 52, så var det Krysset som blei bruka. Og ho hugsa at foreldra hennar, dei irriterte seg veldig over det der Krossen-namnet som hadde kome til, fordi Krossen er ein plass i Vå.