Regjeringa foreslår ei ny motorferdselslov: – Kommunane kjenner sine område og behov best

Langt fleire eig snøskuter, ATV og andre terrengkøyretøy i dag. I dag handlar køyring langt meir om fritid enn før, og ny teknologi har gjort det mogleg å køyre lengre og i fleire område enn før.

– Reglane me har i dag om motorferdsel i utmark er laga for ei anna tid og er vanskelege å forstå. No vil me gjere det enklare både for folk og for kommunane, seier klima- og miljøminister Andreas Bjelland Eriksen (Ap) i ei pressemelding.

Kommunane skal i større grad skal avgjere kvar og korleis motorferdsel skal gjennomførast. 

– Kommunane kjenner sine område og behov best. No gir me dei verktøya til å gjere gode, heilskaplege vurderingar, og me fjernar unødvendig byråkrati som har skapt frustrasjon i mange år, seier Bjelland Eriksen.

I dag blir motorferdsel regulert gjennom fleire ulike regelverk. Dette skal no samlast i ei ny og moderne lov. 

– Me vil gjere det enklare å følgje motorferdselsreglane, men også tydelegare kva som skjer om dei blir brotne. Me vil slå ned på alvorlege og medvitne lovbrot, men folk skal ikkje risikere fengsel for å gjere ein ærleg feil, seier Eriksen.

Lova i dag er frå 1977, og forslaget skal no vere meir tilpassa tida me lever i, står det i pressemeldinga. Forslaget blir no sendt til Stortinget.

(©NPK)