Over hundre ungar har vore med. – Lovar godt for tilveksten
75 deltakarar frå 2 til 13 år stilte til start då Vinje IL hadde klubbmeisterskap som avslutning for årets skikarusell.
Publisert
– Akkurat nok snø, men fare for å bli våt dersom deltakarane datt i siste bakken, melder Åse Hylland frå Vinje IL.
Ho fortel at Bruse var ivrig supporter på klubbmeisterskapen, og mange ytte litt ekstra for å få ein god klem av maskoten. Alle som stilte til start var heidra som vinnarar, men det vart kåra klubbmeister i klassene frå 11 år og oppover. Klubbmeistrane vart: Anne Høgetveit Teigen, Tarjei Østvoll Hylland, Halvor Holte Hylland, Ingrid Høgetveit Teigen og Viljar Kaasa Barstad.
Barnehagebarna gjekk ein liten runde, medan deltakarar frå førskulealder og opp gjekk den lange runden. Det var ein bratt bakke i starten, deretter krevjande utforkøyring før ein lang, slak motbakke gjekk over i det motsette.
– Litt laus snø på oppløpet førde til at nokre av utøvarane stupa over målstreken etter å ha gjeve alt dei kunne, seier Hylland og sender ein stor takk til Anne-Sofie Bergene Strømme for ein supergod jobb som arrangør av årets skikarusell.
Hylland seier at Bergene Strømme har hatt stålkontroll på logistikk og vore med på alle kveldane.
– Når over hundre ungar har vore med, seier det noko om vel blåst, Anne Sofie. Det har tydelegvis vore moro. Dette lovar godt for tilveksten bak Runar Skaug Mathisen, meiner Hylland.
