Éin person omkom i trafikkulykke i Vågslidtunellen

Like før klokka 21 sundag kveld melder operasjonsleiar i Sør-Aust politidistrikt, Ståle Fuglaas, at personen som blei flogen til Oslo med luftambulanse blei erklært død under transport.

Den omkomne er i 40-åra. Pårørande er varsla, og blir ivaretatt av pårørandekontakt i politiet og kriseteam.

Personen som var passasjer i bilen der den omkomne satt er på akuttmottak og er varsla om utfallet.

Ein person i 60-åra har status som sikta i saka, og politiet sikrar nødvendige blodprøver. 

E134 er framleis stengt. Statens vegvesen melder at omkøyring er skilta for aksellast mindre eller lik 7,5 tonn. Personbilar kan køyre rundt Vågslidtunnelen, medan større køyretøy må vente.

Tre personar i ulykke

Klokka 16.35 sundag melder politiet at naudetatane rykker ut etter fleire meldingar om ei alvorleg trafikkulykke inne i Vågslidtunellen på E134.

Det er store materielle skader og det framstår som ein person er fastklemt.

E134 er stengt i begge retningar.

Klokka 16.50 er naudetatane framme på staden.

Politiet Sør-Aust melder at det er ei alvorleg ulykke. To personar er fastklemt og det blir jobba med å frigjere dei.

Det er totalt tre personar involverte i ulykka.

E134 vil vere stengt ein lengre periode. VTS jobbar med omkøyringsveg. 

Ulykkesgruppa frå Statens Vegvesen er på veg til staden. Luftambulanse er også på veg.

Politiet ber bilistar vere tålmodige, det er fleire ressursar på veg.

Fleire ambulanser på staden

Preben Terland har hytte i Vågslid og skal heim til Stavanger sundag ettermiddag. Rundt klokka 17.15 var han i kontakt med Statens vegvesen.

– Dei sa det er kaos på gamlevegen over tunellen når ingen står og dirigerer. Dei ba oss vurdere å køyre Suleskarvegen.

Terland seier det er mykje vind og regn i fjellet, men ikkje så mykje trafikk foreløpig. Hytta hans ligg rundt seks kilometer frå Vågslidtunellen.

Klokka 17.30 melder Terland at tre ambulanser har kome køyrande frå aust og at tre helikopter har landa. Det er nå rundt fem kilometer kø frå aust retning vest.

– Me kjem nok til å køyre Hovden-Suleskar, seier han.

Klokka 19.45: Ulykkesgruppa til Statens vegvesen er på staden og føretar nødvendige undersøkingar. 

Bilbergar er varsla og er på veg til ulykkesstaden. E134 er framleis stengt.

Klokka 18.50: Dei skada er køyrd til traumemottak på Sjukehuset Telemark i Skien, og ein pasient er flogen til Ullevål sjukehus med luftambulanse.

E134 vil vere stengt i fleire timar framover. Ulykkesgruppa til Statens vegvesen er på veg.

Saka blir oppdatert.