Bil har køyrd av vegen

Oppdatert 13.25: Politiet er ferdig. Det viser seg at kvinnen har vore passasjer i bilen, og ikkje sjåfør slik fyrst meldt. Ho sat i framsetet då naudetatane kom til staden, informerer politiet. 

Kvinna blir køyrd til sjukehuset for nærare undersøkingar og behandling. 

Brannvesenet blir att på staden for dirigering til bilbergar kjem og fjernar bilen. Det er ikkje tatt beslag i førarkortet til sjåføren. 

Oppdatert 13.01: Pasienten er nå ute av bilen og sit i ambulansen for nærare undersøkingar. 

Oppdatert 12.51: E134 er stengt i begge retningar. Det er uvisst kor lenge vegen blir stengt. Brannvesenet jobbar med å få ut pasienten og skal i den samband klippe døra. Bilbergar er på veg for å bistå. 

Oppdatert 12.42: Samtlege naudetatar er framme på staden. Politiet hentar inn forklaringar rundt hendingsforløpet. Helsevesenet undersøker involverte partar. 

Glatt

Naudetatane er på veg, opplyser politiet klokka 12.24. 

Ulykka har skjedd omtrent på høgde med innkøyringa til Smørklepp på E134 Haukelivegen i Vinje, opplyser politiet. Det er ein personbil med to personar i som har køyrd av vegen. Føraren sit framleis i bilen, men ho er ikkje fastklemd. Passasjer er ute av bilen, framstår uskadd, melder politiet. 

Brannvesenet har kome til staden. Det er glatt. Bilen ligg i grøfta. 

Saka blir oppdatert