Betre pinsevêr får du ikkje: – Lett over 25 grader

Det ligg an til å bli skikkeleg sommarvêr på Austlandet og Sør-Noreg dei kommande dagane.

– Mange vil få over 20 grader og opp til 25 grader dei varmaste stadene. Nokre stader kan det til og med lett bli over 25 grader. Beste temperaturar kjem sannsynlegvis i indre område i Telemark og Buskerud, seier meteorolog Marek Ratajczak hos Meteorologisk institutt.

Han lovar at sommarvêret i Sør-Noreg held heile helga og dagane vidare neste veke.

– Berre på laurdagen er det litt usikkert nokre stader. Det kan komme spreidde byer her og der. Til og med tore nokre stader, men det er litt sommarleg.

Inst i fjorden

På Vestlandet blir det gråvêr heile helga. I Rogaland kan det kanskje komme ein liten smak på godvêret på Sørlandet ein periode. Men elles blir det trist, grått, vått og kaldt.

– Det blir kanskje litt betre inst i fjordane. Her kan dei få litt opphald og sol om ein er heldig. Men det er ikkje spesielt høge sommartemperaturar. Truleg nærare 10 grader.

Regn og vått

Trøndelag, Nordland og Troms deler ein felles lagnad vêrmessig denne helga. Det blir stort sett regn og grått vêr og stort sett utan store endringar.

– Spesielt Nordland får det våtaste vêret. Det blir neppe noko særleg opphald. Kanskje ei lita luke på fredag, seier Ratajczak hos Meteorologisk institutt.

Vidare på laurdag, søndag og måndag er det skikkeleg gråvêr. Det blir regn heile tida. I tillegg vind og kanskje liten kuling som kjem frå sørvest. Den vil gjere det ekstra surt, grått og kjølig. Medan Finnmark slepp litt lettare unna. Her er det større sjansar for opphald.

Har hatt finvêret sitt

Trøysta til meteorologen for Midt-Noreg og Nord-Noreg, er det fine vêret vi har hatt dei siste dagane.

Både Nordland og Troms målte den første nordiske sommardagen i år med 20 grader. Dermed var den første nordiske sommardagen i år spikra her òg. No står berre att Finnmark som ikkje har registrert over 20 grader i år.

– Trøndelag hadde den varmaste dagen på tysdag med over 23 grader enkelte stader, fortel han.

Førebels er det ikkje noko sommarleg vêr i sikte for neste veke i nord. Medan Vestlandet kan på ny få ein smak på sommar seinare neste veke.

(©NPK)