Nitten år i TV-aksjonens teneste

Det TV-aksjonen handlar om, er kommunikasjonen mellom bøsseberaren og den som opnar døra.

Dei gode sakene er det viktige for Reidar Skogheim. Organisasjonane, dei gode føremåla som får pengane skal ha merksemda. Han vil ikkje ha blest om sin eigen person. Difor var det greitt å takke for seg etter 19 år som fylkesaksjonsleiar i Telemark. Eitt år før 20-årsjubileet. Han likar ikkje jubileum. Men han er altså levande opptatt av dei viktige temaa som får søkjeljoset retta mot seg kvart år i oktober.

Karrieren som aksjonsleiar starta då han, utan å ha søkt jobben, blei beden om å stille til intervju i Oslo. Sidan den gongen har Skogheim vore med på å koordinere innsamlinga av millionvis av Telemarks-kroner til humanitære og veldedige føremål.