Så «slapp katten ut av sekken» i Fyresdal!

Datasenteret blir seks bygg på tre etasjar. Men dei må halde seg innanfor høgda i reguleringsvilkåra, bygg på under 25 meter. Dette sa kommunalsjef Homme nyleg til VTB etter førehandskonferansen med EdgeConneX. Med atterhald om at han er rett referera i avisa, har eg gjort meg nokre refleksjonar.

Kor høgt er dette? Industrietasjar er ikkje det same som husetasjar. Tenk heller på kor høgt 25 meter er. Ein fire etasjes bustadblokk har ei total høgde på 10–14 meter. 25 meter er då tilsvarande ein blokk på 8 etasjar! Bygget til MHM Entreprenør A/S i krysset Fv. 355/Birtedalsvegen er høgt, men likevel bare 12 meter. Seier det noko, tru?

Dei nye opplysningane er ikkje i samsvar med det ordførar Skjervagen sa til kommunestyret 15.02.24. På spørsmål om det skulle bli 25 meter høge bygg, sa han: «Svaret er nei. Det blir ikke 25 meter høye bygg.» (Web-TV 10:35 ut i opptaket.) Seinare i det same møtet, sa han: «Det de planlegger er to etasjer». Han presiserte at det blir ei høgde på ca. 15 meter, og at det er stor forskjell på dette og tre etasjar. Reguleringsendring Molandsmoen blei etter dette godkjent med 25 meter høge bygg!