Heva rosa: I staden for å klappe etter talar og musikk heva alle ei raud rose.

– Utan den dropa hadde havet vore mindre

10 år har gått sidan femten år gamle Eivind Hovden frå Tokke blei skoten og drepen på Utøya. Mange valte å bruke torsdagskvelden sin på Dalen for å minnast han og dei 76 andre som vart offer for terroren i 2011.

Symre Taugbøl Bang Symre Taugbøl Bang Sommarvikar
Publisert Sist oppdatert

– Det er viktig å forstå fortida og nåtida, for å møte framtida, og som før så skal me møte frykt og hat med kjærleik. Ein kan av og til tenkje at det ein gjer ikkje betyr noko, at det berre er ein drope i havet. Men utan den dropa hadde faktisk havet vore mindre, sa leiar av Tokke Arbeidarparti Tove Palmork Haavelmoen.

Arrangørane av minnesmarkeringa var Tokke Arbeidarparti, og programmet bestod av taler, musikk, nedlegging av blomar på minnesmerket og rosetog. Dei som talde i tillegg til Haavelmoen var stortingsrepresentant Lene Vågslid, ordførar Jarand Felland og AUF-ar Ailina Østebø Gaaren.

Eivind Skimmeland, som spelte saman med Eivind Hovden i ungdomsbandet Gul Snø, framførte tre songar.

– Eg var to år yngre enn Eivind, men han brydde seg ikkje om slikt, og me blei gode vener på tvers av klasser. Det er nok mange som vil seie at dei kjente han, nettopp fordi han var så open og venleg mot alle, seier Skimmeland.

Ungdomsarbeidar, og leiar i støttegruppa 22. juli i Tokke Tor Øystein Gravdal kjende Eivind godt. Han har jobba mykje med arrangementet i år, men trur minnestundene for Eivind framover blir rolegare.

– Han stod fram, og var aktiv i alt det han gjorde. Eg var tydeleg på at me ynskte å ha minnesmerket her då det var eit tema, seier han.

Gravdal har passa på minnesmerket kvart år på 22. juli. Saman med ungdomsklubben har han tent fakkel for Eivind kvar veke, og stelt med området rundt.

Tove Palmork Haavelmoen las eit utdrag frå diktet «Du må ikke sove» av Arnulf Øverland

Du må ikke sitte trygt i ditt hjem

og si: Det er sørgelig, stakkars dem!

Du må ikke tåle så inderlig vel

den urett som ikke rammer deg selv!

Jeg roper med siste pust av min stemme

Du har ikke lov å gå der og glemme!

(Arnulf Øverland 1937)

Jarand Felland las diktet «Likegyldighet» av Martin Niemöller

Først tok de kommunistene

men jeg brydde meg ikke

for jeg var ikke kommunist.

false

Så tok de sosialdemokratene

men jeg brydde meg ikke

for jeg var ikke sosialdemokrat.

false

Deretter tok de fagforeningsfolkene

men jeg brydde meg ikke

for jeg var ikke fagforeningsmann.

false

Til slutt tok de meg. Men da var det ingen igjen til å bry seg.

(Martin Niemöller 1946/fleire versjonar)

Utanfor Elvarheim: Eivind Hovden var aktiv, engasjert og glad i ungdomsklubben. Difor var det naturleg at minnesteinen fekk stå utanfor ungdomshuset Elvarheim.
Rosetog: Politiet stengde av trafikken slik at rosetoget kunne gå uforstyrra mellom Elvarheim og Helsesenteret.
Kjærleik skal vinne: Leiar av Tokke Arbeidarparti Tove Palmork Haavelmoen sa mange kloke ord.
Ville bli ordførar: –Eg har blitt fortald i ettertid at Eivind sa at han ville bli ordførar i Tokke. Ein jobb eg trur han hadde gjort framifrå godt, sa ordførar Jarand Felland i sin tale.
Spelte i band saman: Eivind Skimmeland framførte tre songar under markeringa. Han spelte saman med Eivind Hovden i ungdomsbandet «Gul Snø».
Bauta i det norske demokratiet: Sjølv om 22. juli ramma heile Noreg var terroren fyrst og fremst eit åtak mot Arbeidarpartiet, AUF og sosialdemokratiske verdiar.
politikk terrorisme reportasjar krig og konfliktar
Powered by Labrador CMS