Storslegen opning av Vinjes nye lensmannskontor

Det var stappfullt under opninga av Vinje lensmannskontor som vil huse 20 arbeidsplassar.

Med ei Vinje-vridd framføring av Ola Bremnes si låt «Har du fyr» erklærte Scott Florell, Eirin Ofte Gonsholt og Trond Neri Flothyl Vinje lensmannskontor for opna fredag.

– Det er moro å dele ein slik dag. Det er ein stor dag for lensmannsdistriktet. I dette bygget har me det me treng etter dagens standard. Eit politibygg skal vera meir enn ein plass for oss. Ungdom skal kanskje innom her og fortelje om det vanskelegaste dei har opplevd hittil i livet. Me skal utstråle klokskap og ha hjarterom, seier seksjonsleiar ved Vinje lensmannskontor Trond Neri Flothyl.

Sjå bildegalleri her:

Zoom Førre Neste

Eit etterlengta bygg

Inkludert garasjeanlegget er det nye lensmannskontoret rundt 1 000 kvadratmeter. Politiet i Vinje byrja å drifte bygget 4. desember. Derfrå blir Tokke, Fyresdal og Vinje dekt av polititenestene.

– Det er ingen tvil om at dette er eit etterlengta bygg. Me treng fasilitetar me kan utføre tenestene våre i. Trond Neri Flothyl har vore primus motor for å få dette på plass. Det er eit stort arealmessig distrikt dei som jobbar her dekker. Dei køyrer gjerne 100 mil i løpet av ei arbeidshelg, seier Dag Størksen, som er leiar av politiet i Telemark.

Ole Bredrup Sæverud, som er politimeister i søraust, fortel at det er viktig å kunne tilby ordentlege arbeidsforhold, fasilitetar og lokasjon for dei som jobbar fast ved Vinje lensmannskontor og dei som jobbar der ved visse høve.

– Dette ser bra ut og då har me eit godt utgangspunkt for godt arbeid, seier han om det nye lensmannskontoret.

– Du har dei som oppsøker oss i politiet, men dei me helst vil ha tak i kjem ikkje innom, seier han med eit glimt i auget om at politiet ofte er på farten.

Vinje kommune vil vera eit godt vertskap

– Kjære lovas lange arm. Det er fint å stå her under opninga fordi kommunen har jobba lenge med å få ei tung etablering av politiet her i Åmot, seier Vinje-ordførar Jon Rikard Kleven.

Han ser fram til eit godt samarbeid.

– Vinje kommune skal vera eit godt vertskap for politistasjonen som eg likar å kalle det, seier Kleven.

Fekk vist fram redningsaksjon i rasområde

Etter den offisielle opninga med spesielt inviterte blei det arrangert presentasjon av redningstenesta i nærområdet utanfor lensmannskontoret. Det blei konstruert ein redningsaksjon av ei skuleklasse som var på tur i eit område der det gjekk eit ras. Fjellredningstenesta fekk vist fram korleis dei går fram i slike situasjonar med mellom anna hundeekvipasje frå Norske redningshunder.