Føreslår naturtypekartlegging i Ågapet

Naturtypekartlegging er ei statleg satsing for å auke kunnskap om naturen. Tidlegare i haust bad Statsforvaltaren kommunane om forslag til område der dei ynskjer å kartlegge naturtypar. Eit av områda som er forslått er Ågapet i Kviteseid. Innspelet kjem frå Kviteseid kommune, som skriv at utbygging og masseutfylling i vatn søraust for Kviteseid kyrkje kan få konsekvensar for livet i vatn og på land.

Gytebekk for storaure

Det går fram at området ved Ågapet er eit elvedelta med eit rikt registrert mangfald av fuglar, karplanter og fisk. Landbruksrådgjevar Audun Aasmundtveit trekker også fram at Storaurestamma i Bandak har Dalaåi som ein viktig gytebekk, og at utløpet ligg nært knytt opp til der det er planlagt utfylling i vatnet.