Hovudutval for oppvekst, kultur og omsorg i Fyresdal løyver 25 000 kroner frå sin disponible pott til å vidareføre tiltaket kontingentkasse i 2022.
Kontingentkasse skal skape lågare barriere for deltaking i fritidsaktivitetar. Tiltaket skal vere for barn og unge i alderen 6 år til dei er ferdige med vidaregåande skule, og er for dei som er råka av fattigdomsproblematikk.
– Fyresdal har hatt stor glede og nytte av ordninga som er prøvd ut i tre år med stor grad av suksess. Fyresdal har framleis stor grad av barnefattigdom. Dårleg råd har konsekvensar for barn og unges deltaking både i organisert og uorganisert fritidsaktivitet. Det er viktig å vidareføre kontingentkassa, står det i saka til hovudutvalet.
