Så sigla dei over Tinnsjøen

Medan somme sat innandørs i Såheimshallen og høyrde på B-klasse hardingfelespel og andre på Rjukanhuset og høyrde på B-klasse kveding, hadde hundre andre løyst togbillett frå Rjukan stasjon til Mæl. Rjukanbanen, eller Vestfjorddalsbanen som han heitte opphaveleg, blei bygt av Norsk Hydro og opna av Kong Haakon i 1909. Banen blei nedlagt i 1991.

Rjukanbanen

Men i dag går toget. Folk klatrar om bord og plasserer seg i kupeane. Ute nærmar gradestokken seg tretti, og fleire av passasjerane mimrar om togturar før i tida. For glasa kan opnast! «Farleg å bøye seg ut», står det på skiltet, og passasjerane ventar tolmodig på fløytesignalet som indikerer at toget snart rullar i gang. Og der – svalande vestfjorddalluft fyller kupeane medan me sakte køyrer forbi Ingolfsland stasjon. Somme av passasjerane saknar karaffelen med vatn, og dei små kvite pappbegera å drikke av. Men i den grad fludium skulle fortærast her, måtte ein nyte medbrakt.