Kraftverksatsing til meir enn 40 millionar

Dei råka grunneigarane av satsinga er Sverre Tveit, Karl Olav Rørvik, Svein Gunstein Dahl, Gudrun M. Ben Shmuel og Tor Andreas Tveit. Dei får hjelp av Siram AS i samband med konsesjonssøknaden, som er på høyring til 24. november.

Det er Noregs vassdrags- og energidirektorat (NVE) som tek avgjerd i konsesjonssaka som gjeld å bygge både Bjønntjønn kraftverk og Bjønntjønn pumpestasjon.

Restaurere dam

Innleiingsvis i søknaden blir det opplyst at Bjønntjønn tidlegare var regulert for tømmerfløting. Dammen som er i forholdsvis god stand vil bli restaurert i samband med utbygginga.

Byggeprosjektet skal utnytte kraftpotensialet som ligg i fallet i elva Juvåna. Ho renn inn i Heimdøla, som er ei sideelv til Arendalsvassdraget.

I tillegg til å bygge kraftstasjonen blir det søkt om løyve til å legge ei 2150 meter lang røyrgate med diameter 1200 millimeter frå Bjønntjønn, ned langs Fv355 (Gautefallvegen) og fram til kraftstasjonen. Vidare er ynsket å regulere Bjønntjønn med 60 centimeter.

Det blir også søkt om å bygge pumpestasjon for å pumpe vatnet frå Bjønntjønnhylen opp i Bjønntjønn. Det må då bli etablert ein 1,5 meter høg dam rett nedstraums der Lonåna renn inn i Juvåna. Den vesle vasspegelen som vil danne inntaket for pumpestasjonen blir søkt regulert med 50 centimeter.

Nedslagsfeltet til kraftverket ovanfor Bjønntjønn og inntaket utgjer 29,8 kvadratkilometer. Nedslagsfeltet til pumpestasjonen nedstraums dam Bjønntjønn er 12,2 kvadratkilometer.

Frå Bjønntjønn er forslaget ei minstevassføring på 100 liter i sekundet om sommaren, og 65 liter i sekundet om vinteren.

9,3 GWh

Kraftverket blir plassert ved fylkesvegen, og får utløp i Støylsbekken ved Stebuskjerra rett nedanfor vegen.

Kraftverket utnyttar eit fall på 130 meter frå Bjønntjønn til utløp. Simuleringane viser at produksjonen i kraftverket blir 9,93 GWh. Forbruket til pumpa er 0,63 GWH, så då blir netto produksjon 9,3 GWh. (1 GWh er 1 million kilowattimar).

Bygging av kraftverket med utstyr, utløp, røyrgate, inntak, inntakskanal og å restaurere dam er kostnadsrekna til 37,4 millionar kroner. Å bygge pumpestasjonen med utstyr, dam i Bjønntjønnhylen, 135 meter – 700 millimeter røyrgate og innløp er rekna til 5,15 millionar kroner. Av samla kostnad på 42,6 millionar kroner går noko over 2,8 millionar kroner til planlegging/administrasjon.

Utbyggingspris: 4,6 kroner/kWh.