Vintervêret skaper utfordringar, men trafikken går. – Vi har alt av mannskap ute for å halde vegane køyrbare

Mykje snø og vinterlege forhold har gitt problem fleire stader, men stort sett bevegar biltrafikken seg framover.

Fleire sentrale fjellovergangar har vore stengde, mellom anna Haukelifjell og Hardangervidda, men ved 10-tida opplyser Statens vegvesen at det vil bli kolonnekøyring på desse strekningane.

Nå er E134 over Haukelifjell open.

Det blir rapportert om vinterlege køyreforhold i store delar av landet, men førebels flyt trafikken greitt dei fleste stader.

– Folk må ta det fint og pynteleg og berekne god tid. Vi har alt av mannskap ute for å halde vegane køyrbare. Det ser ut som at nedbøren skal gi seg litt utpå dagen, seier trafikkoperatør Hans Gusta Møvik Olsen ved Vegtrafikksentralen aust.

Straumproblem

Sjølv med relativt få problem på vegane har det ikkje gått like knirkefritt for seg andre plassar.

Fleire stader på Sør- og Austlandet har opplevd straumbrot som ei følgje av vêret.

I Agder byrja rapportane om straumbrot klokka 20.30 onsdag kveld. Seinare har fleire slite med straumen, og rapportar om straumbrot har komme frå fleire stader på Austlandet.

Bergensbane-kaos

På Bergensbanen har det vore store utfordringar gjennom natta. Først køyrde eit godstog seg fast i snøen, noko som stansa nattoga både frå Oslo og Bergen.

Då godstoget kom seg laus og brøytinga kunne byrje, oppdaga brøytemannskapane eit snøras.

Toga måtte snu, og hundrevis av passasjerar måtte dermed tilbake til start.

(©NPK)