Tyskarane skal bruke Airbnb heile ferien
Familien Zubke frå Tyskland bur på ei av hyttene Knut Olav Edland leiger ut på Airbnb. Dei liker godt denne måten å bu på og er nøgde med valet.
Publisert
Ulrike Zubke-Goken, Emma Zubke og Anderas Zubke bur på Airbnb-hytta til Knut Olav Edland eit steinkast unna Songavatnet i Vinje. Dei er veldig nøgde med at det er så stille og fint der og at dei kan ha med seg hundane Boue og Frida.
Dagen dei kom fram hadde dei køyrt rett ettet midnatt frå heimbyen Lüneburg i mellom Hamburg og Bremen i Tyskland. Så til Hirtshals i Danmark der dei tok båt til Kristiansand.
– Me er trøytte, men lykkelege for å vere framme, seier Ulrike.
Kvifor på fjellet?
Emma hadde sett Mjonøy på Instagram før familien tok turen til Noreg. Det var ein plass dei måtte innom på noregsturen. Derfor valte dei å bu på ei hytte i Vinje.
Det var likevel fleire grunnar til at dei ville busette seg så langt oppe på fjellet.
Annonse
– Me likar å gå turar, sykle, lese bok og nyte naturen, seier Ulrike, og derfor er det perfekt å vere så langt oppe på fjellet.
Edland fortel at dei kan låne båt og kano. Det vil dei gjerne.
– Bør kjøpe ost
Andreas spør om kva eigedommen blei bruka til før. Der hadde familien til Edland geiter.
– Wow, seier dei og fortel om sauene dei har sett der.
Edland anbefaler dei å ta ein tur innom Lega for å kjøpe ost.
– Har dei brunost? spør Ulrike.
– Ja det har dei, seier Edland og anbefaler dei å kjøpe ein anna type ost også.
Seinare skal tyskarane til Oslo før dei byrjar på turen heim. Då skal dei køyre gjennom Sverige og leige Airbnb i Oslo og Norrköping i Sverige.
