Inviterte bygda til dugnad

Etter ti år i bedrifta Babu har Harald Utigard (53) bruka mykje tid her nede på Tangane. Ikkje fordi han likar å kikke ut over den nydelege utsikta, ei heller for å ta seg ein matbit på ein av benkane. 

Nei, Harald vil helst jobbe. 

Likevel, i dag håpar han å få litt hjelp. 

Inviterte til dugnad

For å gjere området klart til sumaren inviterte Babu alle i bygda til å bidra med ein skikkeleg arbeidsøkt.

– Eg håpar nokon som brukar Tangane meir enn oss blir med, seier Harald mens han festar ei ny snor i kantklipparen. 

Det tar ikkje lange tida før han får ønsket sitt oppfylt. Snart 80 år gamle Frauke Wiens jobbar som frivillig på helsesenteret og når det ikkje er bingo tar ho ofte med ein bebuar i rullestol på ein trilletur ned langs vatnet. 

– Eg synest me skal hjelpe Babu-folket for dei er så flinke. Me bruker stiane mykje i frivilligsentralen og då er det viktig å bidra også her, seier ho. 

Tener ikkje noko

Etter at Babu overtok vedlikehaldet her ute på Tangane, peikar fleire på at dei merkar ein stor forskjell. 

Ein av dei er Bjørn Vindal (62).

– Det har blitt mykje hyggelegare å vere her nå enn for nokre år sidan. Det er moro og hjelpe Babu-gjengen, dei er jo så fantastisk flinke, rosar han. 

Alt gjengen på Babu gjer, gjer dei heilt gratis. No har dei laga nye solstolar som snart skal bli sett opp på den nye bålplassen

– Me har bruka ein del pengar som me har fått gjennom panteinnsamling på ulike prosjekt i bygda. Me i Babu skal jo spreie glede, seier avdelingsleiar på Åheim, May Anette Sollie.