Brrr... Drrr...ivarbekkdalen

Det er i overkant forfriskande utomhus i Vest-Telemark no om dagane. Den uoffisielle kulderekorden har Drivarbekkdalen med minus 37.

– Me har hatt ei uvanleg kald jol og romjol. Nyårshelga her er vanlegvis kald, men denne kuldeperioden har vore spesielt lang. Måndag før jol viste gradestokken minus 33. Seinare har det gått litt opp og ned, men temperaturen har for det meste halde seg på trettitalet, seier Charlotte Sauer som bur i Drivarbekkdalen i Øyfjell.

Ja, me snakkar om temperaturmeldaren Charlotte. Ho som skriv tekstmeldingar til Nrk Telemark og fortel kor bitande kaldt det er i heimbygda. Når programleiarane på Borgeåsen til dømes melder om temperaturar på 31 på Frøystul, er det gjerne ikkje lenge før det tikkar inn ei melding frå Charlotte. 33 grader i Drivarbekkdalen. Ingen over, ingen ved sida. I går toppa det seg. Medan Kviteseid kunne notere seg for 21 minus og Vågslid 26, kom meldinga frå Drivarbekkdalen; 37 kalde.

For kaldt for varmepumpa

– Nå er me leie. Me har nesten ikkje kunne vore ute, seier temperaturmeldaren, som må sprengfyre for å halde det varmt heime på Bjønnemoen.

Og det er veden som er redninga. Før jol investerte familien i varmepumpe, men den har dei ikkje hatt mykje glede av. Ho har nesten ikkje gått, til det har det vore altfor kaldt. Ved temperaturar under 20 grader mister pumpa effekt, forklarar ho.

Snøeldorado

Fimbulvinter til trass, ikkje alle dagar er like gnæsne; bitande kalde. Somme veit å nyte dei praktfulle vinterdagane. Marit Kolstad Johnsen kom flyttande frå Bodø til Flatdal i haust. Den nyinnflytte er svært fascinert av ljoset i heimbygda.

– Det har vore så kaldt, men akkurat no er det vindstille, så difor tok eg ein tur ut no. Sjå så fine skyer, blå og grå, og det nydelege ljoset, smiler ho entusiastisk.

Fint er det også i Åmotsdal. Ut av skogen kjem ei dame på ski som også er svært nøgd med vintervêret. Marit Buer er frå Oslo, men ferierar på 13. året på Kyrkjemoen i Åmotsdal. Ho skryter uhemma av bygda.

– Eg er veldig, veldig glad i staden. Å koma hit om vinteren er å køyre inn i eit snøeldorado. Det er fint å gå på ski her nede i bygda, men endå finare er det på Sudbø. Der er det som å gå inn i ei kvit draumeverd, meiner ho.

Offisielle kuldemålingar

Meteorologisk institutt har tri målestasjonar i Vest-Telemark; i Vinje, Tokke og Nissedal kommunar. Den lågaste temperaturen som har vore målt denne kuldeperioden var på Møsstrond rett før jol. Den 22. desember viste gradestokken 24,8 minusgrader. Etter noko meir behaglege temperaturar i romjoli, sette sprengkulda inn att ved årsskiftet. Andre nyårsdag sokk temperaturen til 21, 3 og dagen etter til 21,9.

Sjølv om 22. desember blei den kaldaste dagen i heile 2009 var det hustrige dagar i februar også. Den 10. februar toppa Møsstrond-statistikken med 23,1 grader.

Ved målestasjonen i Høydalsmo har det heller ikkje akkurat vore tøyr dei siste dagane. Kaldaste dagen var 2. januar, med ein temperatur på minus 24 blank. Men fyrste delen av februar i fjor var også isande kald. Rekorden var 27,8 minusgrader, målt den 3. Men tri andre dagar hadde også temperaturar lågare enn den kulda me har no. 2. februar var temperaturen minus 25,4, den 9. 27,6 og den 12. 24,9.

Sjølv om det kan vera bitande kaldt i Nissedal også, kan nok ikkje målestasjonen ved Tveitsund bru skilte med vesttelemarkrekordar når det gjeld kuldegrader. Den mest blåfrosne dagen i denne kuldeperioden var den 30. desember då kvikksølvet kraup ned til 14,7 grader. Men 9. februar i fjor var det kaldare, 18,1 minusgrader var rekorden på Tveitsund målestasjon i året som gjekk.

Tidlegare rekordar

Meteorologisk institutt har dei siste tiåra hatt fleire ulike stasjonar som har målt minimumstemperaturar. Rekorden har målestaden Sæli I i Seljord, som var i drift frå 1964 til 1969, med 34,8 grader. Deretter kjem Øyfjell, ein målestad som var i drift frå 1979 til 1992. Der stoppa gradestokken på 33,6 grader den 10. januar 1987. Same området har to gonger vore nede i 33 blank; fyrst Øyfjell igjen. Den iskalde dagen var 8. januar i 1982. Så på Trovatn, stasjonen som var i drift frå 1992 til 2004. Det skjedde 4. februar i 2001.

(Kjelde: Meteorologisk institutt)