Korps i medvind på nasjonaldagen
På nasjonaldagen var dei åtte aspirantane i Seljord skulemusikk på plass i flotte nye uniformer. Etter aktivt rekrutteringsarbeid nærmar skulekorpset seg 30 medlemmer.
Endeleg var dagen her. Nasjonaldagen dei har øvd og øvd, marsjert og gledd seg til. Musikantane i Seljord skulemusikk var av dei fyrste som starta nasjonaldagen i heimbygda, då flagget blei heisa til tonane frå «Ja, vi elsker» utanfor Granvin kulturhus torsdag morgon.
Skulemusikken har i år fått fleire nye medlem, dei har med andre ord fått løn for rekrutteringsarbeidet dei har gjort.
Artikkelen held fram under annonsen.
Leiar i skulekorpset, Anne Torunn Øverbø, fortel at det er 15 medlemmar i hovudkorpset og 8 aspirantar i dag.
– Me vil halde fram med å rekruttere fleire musikantar, for her er plass til fleire. I år måtte korpset også investere i nye små uniformer for 30 000 kroner sidan me ikkje hadde nok i dei små Og dirigent Gunn Steinstad har gjort om nokon av til enklare versjonar, slik at både små og store kan vere med å spele i toget, fortel Øverbø.
Nye uniformer
To av aspirantane som har gledd seg til nasjonaldagen er Astrid og Tone Brekka Skoland (8).
– Me starta i korpset i fjor haust, og spelar klarinett. Me hadde lyst til å vere i korpset etter at me såg dei spela ein konsert, smiler tvillingane samde.
Dei synest det er veldig moro å spele i korps, og fortel at dei finn på mykje moro der.
Den nye uniforma var også eit høgdepunkt for Astrid og Tone.
– Fyrst tok eg på skjorta og slipset, så buksa og etterpå jakka og hatten, forklarar Astrid.
– Og så veska då, legg Tone til og fortel at det er både notar og regntøy i veska.
Artikkelen held fram under annonsen.
– Men eg trur ikkje me får bruk for regnøy i dag, smiler Astrid og fortel at dei skal bruke dei nye bunadane som bestemor har sydd også i løpet av dagen.
Mamma Stine Brekka Skoland rosar det gode miljøet og samhaldet i skulekorpset i Seljord.
– Her blir alle inkludert og om ein er aspirant eller musikant er ein like viktig, seier ho.
Yngstedotter Nora (7) synest også korps er gøy, ho skal starte som aspirant saman med fem andre til hausten – men på denne nasjonaldagen hadde ho fått ei anna oppgåve. Ho skulle vere duskberar saman med pappa Knut Inge fremst i toget.
– Det blir moro, smiler 7-åringen som også gledde seg til å ete litt is på 17. mai.
