Kan bli over 20 grader i Sør-Noreg neste veke

Det blir eit vêrskifte i Sør-Noreg etter fleire dagar med kald luft frå nord. Til neste veke vil varm luft frå sør kunne skape temperaturar over 20 grader.

– Temperaturane skal stige ein del i sør, og det kan komme temperaturar opp i 20 grader, seier statsmeteorolog Marit Berger til NTB.

Høgtrykk og lågtrykk skal byte plass etter at kald luft frå nord har prega temperaturane i Sør-Noreg dei siste dagane. Månadsskiftet til mai neste veke kan by på nær sommar-temperaturar fleire stader i landet.

Det er ikkje sikkert ein når 20 grader, men den varme lufta frå sør vil definitivt kunne føre til ein mild start på mai månad, ifølgje meteorologen.

– Vêrmessig er det generelt ein litt ustabil periode med mykje skiftande vêr, skyer og moglegheiter for byer innimellom, seier Berger.

I Vest-Telemark er dei varmaste temperaturane meld torsdag neste veke, med 19 grader både i Kviteseid og Dalen.

Skogbrannfare

Når vinteren har sleppt taket, snøen har smelta og gammalt gras kikkar fram, blir det gjerne fare for brann i skog, gras og lyng. Meteorologane har for tida ute eit gult farevarsel som åtvarar folk om at vegetasjonen lett kan ta fyr. Farevarselet vart sendt ut måndag denne veka.

Førre veke tredde også det generelle bålforbodet i kraft, minner meteorologen om.

– Ein bør passe på når ein skal grille, det er lurt å gjere det på ein stad der det er lagt til rette for det, seier ho.

Elles er pollensesongen for lengst i gang, og ifølgje pollenvarselet frå Astma- og allergiforbundet ligg no bjørkepollen på eit moderat nivå på Austlandet. I resten av Sør-Noreg er nivået på eit beskjedent nivå.

Også litt varmare i nord

Elles er det venta noko nedbør enkelte stader i Sør-Noreg dei neste dagane. Nedbøren kan komme som sludd og snø i høgda, men denne snøen er ikkje venta å bli liggjande lenge. Men innover mot helga vil vêret bli av det meir tørre slaget.

Samtidig skal temperaturane også stige noko i nord, men her vil det framleis halde seg kjølig enkelte stader.

– Det er ikkje venta mykje nedbør i Nordland. Lenger nord i indre strøk vil det vere større risiko for nedbør, seier Berger.

(©NPK)