Solskinn og fairplay på Vinjecup 2022

29 lag frå åtte ulike klubbar var i sving på Vinjecup laurdag 20. august. – Me forventar fairplay, og at dei vaksne klappar og jublar for begge laga, seier leiar i Vinje fotball, Kjersti Kaasa.

Det er aldersgruppene 8–10 år som konkurrerer mot kvarandre på Vinjecup.

– Det er mange spelarar blant dei små, og oppmøtet på cupen er bra, seier leiar for Vinjecup, Margit Ljostad.

Fairplay og foreldrevett

Denne strålande laurdagen i Åmot er full av fotballglede og positive heiarop. Det er likevel ikkje alltid tilfelle i fotballen, noko som mellom anna vart skildra i ytringa «breddefotballens skyggeside».

– Vinje fotball er ein fairplayklubb, slår Kaasa fast.

– Me har fokus på fin språkbruk blant spelarane og god åtferd på banen. Me gjeng gjennom reglane med trenarane våre også, held ho fram.

Både Ljostad og Kaasa ser at mange spelarar fell ifrå i 12-13-årsalderen, men dei har ikkje inntrykk av at dette er knytt til topping av lag eller at spelarar gjev seg fordi dei får lite speletid på kamp.

– Eg trur det er meir på grunn av at interessene deira endrar seg enn dette med topping av lag, seier Kaasa.

Ho er tydeleg på at klubben vil tak i det dersom dei skulle høyre om slike hendingar.

– Som fairplayklubb jobbar me også inn mot dei vaksne. Me forventar foreldre og trenarar på sidelina som ikkje kjeftar, og som gjev ungane ei god oppleving. Dei må kunne heie og juble for begge lag, seier dei to blide arrangørane.