Lada opp til Landsskyttarstemnet med dansebandfestival

– Eg har vore litt til og frå når det gjeld LS. Eg var i Målselv i 2016 og sto over dei to påfølgjande åra før eg skaut i Evje i 2019. Så følgde to koronaår, og i Bodø i 2022 og Voss i fjor var eg ikkje med. Difor passa det bra å ta ein tur igjen i år. Mest på grunn av at eg har gode Steinkjer-minne og det no er ei stund sidan eg har vore med. Det var kjekt å vere tilbake, sa Bergland.

Det var ikkje håpet om gode poengsummar og bra plasseringar som fekk fyresdølen til å hekte på campingvogna og deretter setje kursen for Trøndelag. Det handla like mykje om det sosiale då han køyrde rundt 1700 kilometer for å skyte nokre seriar. Musikkinteresserte Olav Dagfinn fekk også med seg ein dansebandfestival på turen oppover til landsskyttarstemnet.

Han la inn ein stopp på Dokka og fekk såleis med seg mykje på det som vart like mykje ein ferietur. LS er for han som flesteparten av dei godt og vel 4000 skyttarane så mykje meir enn eit skyttarstemne.