I fjor øydela korona store delar av sesongen. Nå har Herman fått nok ein kjedeleg beskjed. – Håpar 2024 blir betre

Herman Hogstad Sveinsson (18) mistar størstedelen av friidrettssesongen etter å ha fått kyssesjuken i vår.

Vårsesongen var utfordrande for sprinttalentet frå Seljord. Trass iherdig trening og deltaking i fleire konkurransar, var ikkje responsen som venta. Tvert om. Det var ikkje berre stagnasjon for den raske seljordingen, men kraftig tilbakegang samanlikna med tidlegare sesongar.

– Eg hadde ein periode på 2-3 veker med sjukdom og utmatting, men det fall meg ikkje inn at dette kunne vera kyssesjuken, seier Hogstad Sveinsson til VTB.

For å finne ut av problema blei lege kontakta. Tidlegare denne månaden kom svaret: Hogstad Sveinsson har hatt kyssesjuken i april/mai. Det betyr at alle konkurranse og trening stoppar opp.

– Kjedeleg, men eg får håpe eg kjem tilbake og at det ikkje tar fleire år, som eg har høyrd om, seier sprintaren.

Han er likevel glad for å ha fått svar. Saman med pappa Bent håpar han å få reist inn til Olympiatoppen i Oslo så raskt som mogleg for å få rettleiing vidare.

– Ein veldig kjip situasjon å stå i, men dette er jo ein del av det å vera toppidrettsutøvar. Det skal ikkje alltid gå på skinner. Dette er erfaring. Eg er framleis ung, og håpar på å kome sterkare tilbake, seier Hogstad Sveinsson, som i fjor fekk korona då han var på sitt beste og fekk store delar av sesongen øydelagt.

– Realistisk sett så bør me legge denne sesongen meir eller mindre til side og sjå fram mot neste. Eg håpar 2024 blir betre, seier 18-åringen frå Seljord.

Etter sommaren flyttar han til Oslo der han skal gå på folkehøgskule.

– Eg brukar dette skuleåret som eit friår der eg kan kombinere idretten med det sosiale. Ser for meg at dette blir eit bra år, avsluttar han.