Herman (20) har lagt eit tøft år bak seg. Nå ser han framover

– Det har vore tøft å kjenne at kroppen ikkje er i slag.

Herman Hogstad Sveinsson har sett seg ned med lokalavisa på kafeen på Telesenteret. Han har sommarjobb på Meny og har akkurat avslutta skiftet sitt. Over ein kaffikopp og eit stykke baklava gjev han ei oppdatering på karrieren. For det har vore relativt stille frå utøvaren som var blant dei raskaste i landet som 16-, 17- og 18-åring. Sveinsson har ni medaljar frå UM og seks frå det nasjonale prestisjestemnet Tyrvingleikene, men så kom motgangen.

Midt på sommaren 2022 – då han var i toppform – fekk han påvist korona, som gjorde at sesongen var over. I 2023 blei det konstatert ein ny nedtur: Herman hadde fått kyssesjuken. Noko form for trening var uaktuelt ei lang stund, sprintaren måtte igjen sjå fram mot neste sesong.