Trivest: Even Northug, Kari Øyre Slind og Mikael Gunnulfsen er stornøgde etter ei veke med trening i Vrådal. Foto: Else Børte

Her legg langrennsløparane grunnlaget for sesongen

I løpet av treningssesongen frå mai til oktober har Team Telemark flest treningsdøgn i Vest-Telemark. Skiløparane trivest godt med treningsmoglegheitene både i Vrådal og på Rauland.

Teamsjef i Team Telemark, Hans Kristian Lahus, meiner skilaget aldri hadde eksistert om det ikkje hadde vore for Vest-Telemark og aktørane der.

– Me har alltid hatt eit godt fotfeste i Vest-Telemark. Vest-Telemark har vore ein heimebane for oss heilt sidan me starta opp laget i 2016, seier Lahus.

– Telemark er identiteten vår

God stemning: Mikael Gunnulfsen og Hans Kristian Lahus slår av ein prat med mykje latter utanfor romma utøvarane har budd på ei veke. Foto: Else Børte

Team Telemark har absolutt flest treningsdøgn i Vest-Telemark i forhold til andre destinasjonar i løpet av ein treningssesong.

– Me er flest døgn i Vest-Telemark på grunn av destinasjonen Rauland og aktøren Straand, seier Lahus.

Team Telemark har 50 døgn med treningssamlingar mellom mai og sesongstart på Beitostølen midt i november.

– Desse døgna har me i her i fylket. Telemark er identiteten vår. Resten av tida trenar utøvarane der dei bur. Me har tre løparar frå Telemark og fire frå Vestfold, seier Lahus.

13 utøvarar, åtte gutar og fem jenter, har vore på treningssamling i Vrådal frå 11. til 17. juni.

– Dei som er her er toppidrettsutøvarar. Me er eit av tjue profflag her til lands. Det er alltid kamp om å ha dei beste utøvarane. Me har vore det beste privatlaget dei siste tre–fire åra, seier Lahus, som var med å etablere Team Telemark saman med raulendingen Jostein Vinjerui som nå er landslagstrenar for britane.

Team Telemark er eit lag for seniorar over 20 år.

– Me følgjer sjølvsagt med på juniorane. Ingerid Vadder er ein spanande utøvar. Det same er Johannes Lønnestad Flaaten. Eg håpar me kan ta dei imot på laget når dei blir vaksne, seier Lahus.

Artikkelen held fram under annonsen.

Northug synest Vrådal er knallfint

Knallfine forhold: Even Northug er svært nøgd med treningsopphaldet i Vrådal. Foto: Else Børte

Even Northug (24), som i tillegg til 80 treningsdøgn i høgda i Mellom-Europa, er blant Team Telemark-utøvarane som har 50 treningsdøgn i Telemark. I år er han inne i sin andre sesong som «telemarking».

– Eg er veldig nøgd med å vera på Team Telemark. Etter eitt år på laget er det ikkje noko anna alternativ å velje. Laget har bra leiarteam, smøreteam, trenarar og utøvarar. Eg trivst, seier veslebroren til Petter Northug.

Han fortel at opphaldet i Vrådal har vore knallfint i år.

– Rulleski og springing fungerer fint i Vrådal, seier Northug.

Planen hans for vintersesongen er å gå verdscup.

Ny på laget

Frå landslaget: Kari Øyre Slind har etter fire år på landslaget gått over til Team Telemark. Foto: Else Børte

Kari Øyre Slind (28) har sitt fyrste år på laget. Ho kom til Team Telemark etter fire år på landslaget. Proft opplegg og bra smøreteam lokka ho til telemarkslaget.

– På Team Telemark er det godt tilrettelagt for å prestere bra. Eg håpar erfaringa mi og treningsmotet mitt er med på bidra. Dessutan er eg flink på skitprat. Me må ha det litt moro også, smiler 28-åringen.

Slind bur til dagleg i Lillehammer og er på si fyrste treningssamling i Vrådal. Besøket gjev såpass meirsmak at ho kjem til å anbefale folk å ta turen dit.

– Det er heilt rått i Vrådal – ei skikkeleg naturperle der ein får god treningsvariasjon, seier ho.

Målet hennar for sesongen er å gå mest mogleg verdscup og å delta i VM i Oberstdorf.

Artikkelen held fram under annonsen.

Med frå starten av

Enkelt val: Mikael Gunnulfsen er stolt av å vera telemarking og då er det eit enkelt val å vera utøvar på Team Telemark. Foto: Else Børte

Mikael Gunnulfsen (27) frå Åfoss har vore med på Team Telemark alle fem åra.

– Det er eit enkelt val og gjev meg konkurransefortrinn å vera med i Team Telemark. Når eg har telemarksdrakta på, så går eg for mitt eige fylke. Eg trivest godt i Telemark. Fylket vårt er eit Noreg i miniatyr. Me har fantastisk fine destinasjonar å trene på til kvar årstid, seier Gunnulfsen.

Han ser på Vrådal som ei skikkeleg perle med fine landevegar å gå rulleski på, i tillegg til flott løpsterreng og padlemoglegheiter.

– Det er kanon at dette er blitt ein årleg tur. Me bur eigentleg aldri finare enn i Vrådal, seier Gunnulfsen.

Sesongens mål for 27-åringen er vera innanfor topp tre i alle klassiskrenna han skal gå. Han er med i noregscup og Skandinavisk cup.

– Det ultimate målet er å gå verdscup, avsluttar han.