300 elevar på Tinestafett i Høydalsmo. – Det er moro at me kan samlast frå fleire skular
Onsdag var elevar frå seks skular samla i Høydalsmo for å drive med friidrett.
I løpet av dagen fekk elevane prøve seg på ulike øvingar. Dei har kasta med liten ball, støyta kule, sprunge 60 meter, og hoppa både lengde og høgde.
Dagen vart avslutta med stafett, der elevar frå dei seks skulane konkurrerte mot kvarandre klassevis.
Artikkelen held fram under annonsen.
10. klasse er arrangørar
Tinestafetten er for elevar frå 6.–9. klasse og i år er elevane frå Rauland, Øyfjell, Åmot, Tokke, Kviteseid og Høydalsmo representert. 10.-klassingane ved Høydalsmo skule har på seg lilla t-skjorter. Dei er arrangørar og bidreg med mykje av det praktiske arbeidet med idrettsarrangementet.
Sprang to etappar
David Chung Fossli og Heine Tvitekkja Skjelde har tatt turen frå Rauland.
– Det er veldig moro at ein kan samlast frå ulike skular til stafett, seier David.
Han skal springe femte etappe for 7. klasse på Rauland skule.
Heine har på seg to startnummer.
– Det var ein på laget som trakk seg, fortel han.
7.-klassingen tok derfor på seg ei ekstra etappe, og skal spring både første og siste etappe for Rauland skule.
Fin måte å fremme aktivitet på
Trine Lothe er lærar på Høydalsmo skule og har i mange år vore engasjert i det årlege idrettsarrangementet.
Artikkelen held fram under annonsen.
Ho meiner Tinestafetten er ein god måte å fremme aktivitet på, og fortel at dei også har det som eit mål å øve fram mot.
At elevar frå fleire skular kjem til Høydalsmo for å drive med friidrett ein dag i året synest ho er bra.
– Det er fint å samlast på ein felles arena, seier ho.
Tinestafett
Tinestafetten blir arrangert av Noregs Friidrettsforbund og TINE. Målet er å fremme fysisk aktivitet og breiddeidrett blant barn og unge. Kvart år deltek over 100 000 ungdommar mellom 6. –9. trinn, fordelt på rundt 300 arrangement, for å drive med idrett i skulen. Stafetten har eksistert sidan 1993.
