140 deltakarar sprang, gjekk, sykla, trilla og rulla seg gjennom Dalen i haustsola. – Jubileet vart ein suksess!
Med langt over 200 deltakande og vêrgudar som spelte skikkeleg på lag, konkluderer IL Tokke med at laurdagens 100-årsjubileum verkeleg var ein suksess.
140 deltakarar sprang, gjekk, sykla, trilla og rulla seg gjennom Dalen i haustsola. 66 deltok på tid, og 57 barn deltok med raske, små steg i barneløypa. Arrangementet trekte til seg deltakarar frå mellom anna Tokke, Vinje, Seljord, Kviteseid, Tinn, Røldal og Oslo. Blant deltakarane var både mosjonistar og idrettsutøvarar. Ei russegruppe frå Vest-Telemark VGS serverte rykande ferske sveler og kaffi, og felles oppvarming, musikk og den kvikke røysta til speaker Øystein Jacobsen var alle viktige brikker for at arrangementet vart vellukka.
Raskast kvinne rundt 10 km-traseen var ultramaratonløpar Marie Veslestaul for IL Dyre Vaa. Raskaste mann på same distanse var Rune Hana for Vinje IL. På 5 km for herrar var Bjørn Inge Selstø for Høydalsmo Idrottslag den raskaste, og i dameklassa var det Tuva Smalås Bergheim for IL Tokke som stakk av med sigeren. Detaljar knytt til resultata er å finne på EQ Timing sin nettstad.
Artikkelen held fram under annonsen.
IL Tokke takkar alle deltakarar og støttespelarar, sponsorar og friviljuge, og håpar på å gjenta suksessen allereie neste år.
