Kombinerer trim og søppelplukking
Uttrykket plogging (plukking og jogging) oppstod i Sverige for eit par år sidan. Sist torsdag var elevar i 2. klasse ved barne- og ungdomsarbeidar-lina ved Vest-Telemark vidaregåande skule på Dalen ute og plogga.
– Elevane er delte inn i grupper med tre og fire elevar, og dei har fått tildelt kvart sitt område der dei skal plukke søppel. Dei får litt over ein time på seg, så det blir travelt. Men tanken er at dei både skal jogge og plukke søppel, seier faglærar Birgit Johanne Kovajord Olsnes.
40 000 plukka
Det var NRK som tok initiativet aksjonen «Heile Noreg ryddar», og det blir sagt at rundt 40 000 var med og rydda søppel rundt om i landet.
Artikkelen held fram under annonsen.
– Elevane som har smarttelefon skal laste ned ein app som fungerer som ein skritteljar slik at me får sjå kor langt elevane har gått medan dei plukkar søppel, forklarer kontaktlærar Ågot Takle Nesland.
Utstyrt med søppelsekkar og eingongshanskar la elevane ut på dagens kombinerte trim- og plukkeøkt som var lagt opp til å vere ein konkurranse mellom gruppene.
– Me seier at de får eitt poeng for kvart skritt som er registert, og de får 15 poeng for kvar søppeleining. Det betyr til dømes at de får 15 poeng dersom de plukkar ein sigarettsneip. Me tel når de kjem tilbake, forklarer Olsnes.
Bra for miljøet
Aksjonen er ein del av gymnastikktimen og samfunnsfagtimen i klassa, og elevane er motiverte før dei går ut for å plogge.
– Dette er bra for miljøet og det er bra for Dalen, smiler Solveig Bruhaug som plukkar saman med Selma Osman og Marit Nyhus Bjåen.
Trioen har fått tildelt området frå skulen til Vistad, men dei finn ikkje all verda mykje søppel.
– Det var overraskande lite søppel langs vegen, så kan hende har det vore nokon andre og plukka før oss. Men litt fann me sjølvsagt, seier dei.
Trusefunn
Vel tilbake i klasserommet innser faglærar Olsnes at det blir nesten umogleg å telje kvar einaste minste søppeleining, så det blir bestemt at alle gruppene får lik premie.
Artikkelen held fram under annonsen.
– Kva er det mest spesielle de fann i dag?
– Ågot fann ei herretruse, kjem det frå bakerste pult i klasseromet.
Elevane kunne elles fortelje at dei var overraska over mengda med sigarettsneipar og brukt porsjonssnus som blei funne på skuleområdet, og at dei hadde varsla leiinga ved skulen om dette.
– Det er anviste røykeplassar, så dette var litt overraskande, seier Nesland og Olsnes.
