Ungdomsskuleelevane samla til tradisjonsrik volleyballturnering
Ungdomstrinna i Tokke og Vinje møttest nyleg til den årvisse volleyballturneringa som har engasjert elevar sidan 2004. Det sosiale lågterskeltilbodet står sterkt, og interessa for volleyball er på full fart opp att i Vinje.
Volleyballturneringa mellom ungdomsskular i Tokke og Vinje vart arrangert for fyrste gong i 2004, etter initiativ frå dåverande lærar Kjell Folven ved Åmot skule. Han gjekk av med pensjon i 2013, men turneringa held fram med å vere like populær no som då. Dette trass i at det er mange år sidan Vinje sist hadde volleyballag i seriespel.
Lærar Morten Bråstøyl, som sjølv har vore ein ivrig volleyballspelar, har nyleg starta opp volleyballtreningar for ungdomstrinna. På det meste har rundt 30 elevar møtt på øvingane, noko som viser at interessa og talenta stadig er til stades i Vinje.
– Denne turneringa er noko elevane gler seg til kvart år. Dei spør alt når dei byrjar på skulen om hausten om dei kan få trene til turneringa, fortel lærar og turneringsgeneral Arild Fossland.
Lågterskeltilbod
Annonse
Bladfyken møtte mellom anna åttandeklassingane Hilde Årlid Aasen, Sigrid Hovden, Kaja Lien og Signe G. Fjell frå Åmot og Rauland. Dei hang spente langs ribbeveggen medan dei venta på kamp. Hilde hadde vunne alle kampane sine så langt.
Ho fortel at ho har spelt mykje på skulen fram mot turneringa, og at dette er noko dei ser fram til kvart år. Å treffe mange elevar frå ulike skular og få spele kampane er det kjekkaste med dagen, seier Aasen mellom slaga.
Fossland legg til at turneringa først og fremst er eit sosialt tilbod. – Me håpar elevane har det morosamt. Det er målet vårt. Tilbodet skal vere lågterskel, og alle som har lyst skal få vere med, seier han vidare.
